Երևանյան 9-րդ երաժշտական փառատոն. «Համերգներին ելույթ են ունենալու յուրահատուկ երաժիշտներ»
90-ամյա Հայաստանի ազգային ֆիլհարմոնիկ նվագախումբը սկսում է իր հոբելյանական համերգաշրջանը: Հոբելյանական 2015-2016 թթ. համերգաշրջանը կազդարարվի Երևանյան 9-րդ երաժշտական փառատոնի մեկնարկով՝ սեպտեմբերի 10-ին Ալ. Սպենդիարյանի անվան օպերայի և բալետի ազգային ակադեմիական թատրանում:
«Այս փառատոնը դարձել է երաժշտական արվեստի կարևոր իրադարձություններից մեկը: Բոլոր համերգներին ելույթ են ունենալու յուրահատուկ երաժիշտներ: Իսկապես հաջողվել է մեր փառատոնին հրավիրել լավագույններին»,- լրագրողների հետ հանդիպման ժամանակ ասաց ֆիլհարմոնիկ նվագախմբի գլխավոր դիրիժոր Էդուարդ Թոփչյանը:
Փառատոնի ընթացքում լինելու են համերգներ, որոնք նվիրված են լինելու Հայոց ցեղասպանության 100-րդ տարելիցին: Է. Թոփչյանն ասաց, որ այս տարվա ընթացքում նվագախմբի բոլոր համերգներն առաջին հերթին նվիրված է եղել Հայոց ցեղասպանության 100-րդ տարելիցին:
Սեպտեմբերի 10-ից հոկտեմբերի 28-ն ընթացող փառատոնային ծրագիրը բավականին հագեցած է. կկայանա 8 սիմֆոնիկ, 6 կամերային համերգ: Փառատոնին իրենց մասնակցությունը կունենան ասպարեզի հայտնի ու մեծ վաստակ ունեցող շուրջ 30 հրավիրյալ և հայաստանցի արտիստներ. ջութակահար Վադիմ Ռեպին (Ռուսաստան), դաշնակահար Լեյֆ Ուվե-Անդսնես (Նորվեգիա), ալտահար Քիմ Քաշքաշյան (ԱՄՆ), թավջութակահար Ալեքանդր Չաուշյան (Մեծ Բրիտանիա), Բորոդին քառյակ (Ռուսաստան), ջութակահար Ակիկո Սուվանայ (Ճապոնիա), ֆլեյտահար Մասսիմո Մերչելլի (Իտալիա), դիրիժոր Պիեր Կառլո Օրիցիո (Իտալիա), ջութակահար Անուշ Նիկողոսյան (Հայաստան) և ուրիշներ: Այս տարի թվով 10-ը հրավիրյալ մենակատարներ վարպետության դասեր կտան հայ երիտասարդ երաժիշտ-կատարողներին:
Փառատոնն իրականացվում է ՀՀ նախագահի տիկին Ռիտա Սարգսյանի բարձր հովանու ներքո և մշակույթի նախարարության աջակցությամբ: Փառատոնի գեղարվեստական ղեկավարներն են Ալեքսանդր Չաուշյանը և Էդուարդ Թոփչյանը:
Փառատոնի բացման համերգին ելույթ է ունենալու ջութակահար Վադիմ Ռեպինը՝ ներկայացնելով Բրուխի ջութակի կոնցերտը:
Ասուլիսին ներկա Վ. Ռեպինն ասաց, որ յուրաքանչյուր փառատոն տոն է ու պետք է մարդկանց մոտ առաջացնի դրական, երջանիկ էմոցիաներ:
Ջութակահարն ու նվագախումբն արդեն ունեցել է առաջին փորձը . «Գոհ եմ, բաց ու հաճելի մթնոլորտում անցավ փորձը»:
Է. Թոփչյանը հույս հայտնեց, որ արդեն փառատոնի երկրորդ համերգը՝ սեպտեմբերի 15-ին, կկայանա Արամ Խաչատրյան համերգասրահում, որտեղ վերանորոգման աշխատանքներն ավարտվել են: