Թրաֆիկինգի դեմ պայքարում Հայաստանը դուրս է եկել հատուկ վերահսկողության երկրների գոտուց
ՀՀ գլխավոր դատախազի տեղակալ Մնացական Սարգսյանն այսօր ընդունել է Արաբական Միացյալ Էմիրությունների պատվիրակությունը` խորհրդարանական հարցերով նախարարի տեղակալ Սայիդ Մուհամմադ ալ Ղոֆալի ղեկավարությամբ:
Ինչպես Panorama.am-ին հաղորդում են դատախազության Հանրային կապերի վարչությունից , ԱՄԷ պատվիրակությունը Հայաստանում է 2009 թ. Հայաստանի և ԱՄԷ-ի միջև ստորագրված «Մարդկանց շահագործման / թրաֆիկինգի / դեմ պայքարի բնագավառում համագործակցության մասին» փոխընբռման հուշագրի շրջանակներում հայաստանյան կողմի հետ համագործակցության վերաբերյալ մի շարք աշխատանքային հարցեր քննարկելու նպատակով: Հուշագիրն ի դեպ, Սայիդ Մուհամմադ ալ Ղոֆալիի խոսքերով, աննխադեպ է ԱՄԷ և այլ պետությունների հետ կնքված միջազգային պայմանագրերի շարքում:
Հայկական կողմը ներկայացրեց ՀՀ գլխավոր դատախազության կատարած աշխատանքները թրաֆիկինգի դեմ պայքարում, հատկապես նշելով, որ ՀՀ գլխավոր դատախազի հրամանով դեռևս 2006թ. դատախազության քննչական վարչության կազմում ստեղծվել էր առանձին ստորաբաժանում մարդկանց առևտրի և անօրինական միգրացիայի (թրաֆիքինգի) դեմ պայքարի բաժին, որտեղ կենտրոնացված կերպով քննվում էին թրաֆիքինգի վերաբերյալ քրեական գործերը: Նշվեց նաև, որ դատաիրավական բարեփոխումների երկրորդ փուլի ընթացքում ՀՀ դատախազության համակարգից հանվեց քննչական ապարատը, որի հետևանքով թրաֆիքինգի վերաբերյալ գործերի քննությունը իրականացվել է ՀՀ ոստիկանության տարածքային և համայնքային քննչական բաժիններում:
Նշված հանցագործությունների կենտրոնացված քննության պրակտիկան վերականգնելու նպատակով, գլխավոր դատախազ Աղվան Հովսեփյանի հանձնարարությամբ ՀՀ ոստիկանության գլխավոր քննչական վարչության հատկապես կարևոր գործերով քննության վարչությունում ստեղծվել է մարդկանց առևտրի, թմրամիջոցների ապօրինի շրջանառության և կազմակերպված հանցագործությունների քննության բաժին:
Դատաիրավական բարեփոխումների 2-րդ փուլում ՀՀ գլխավոր դատախազության կառուցվածքում կատարված փոփոխություններից հետո ՀՀ գլխավոր դատախազի 30.11.2007թ. հրամանով ստեղծվեց մարդու դեմ ուղղված հանցագործությունների գործերով վարչություն, որի վրա էլ դրվեց թրաֆիքինգի փաստերով հարուցված քրեական գործերի նախաքննության օրինականության նկատմամբ իրականացվող դատախազական հսկողությունը:
Մ. Սարգսյանը նշեց նաև, որ թրաֆիկինգի դեմ պայքարում ՀՀ գլխավոր դատախազության հետևողական աշխատանքի արդյունքում Հայաստանը դուրս եկավ նաև հատուկ վերահսկողության երկրների գոտուց:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան