Ձեր վստահելի աղբյուրը

ՀՀԿ մամուլի խոսնակ, ԱԺ փոխնախագահ Էդուարդ Շարմազանովն այսօր լրագրողների հետ զրույցում անդրադառնալով հարցին՝ ինչպես է քվեարկելու ՀՀԿ խմբակցությունը վարչապետի ընտրության ժամանակ, նշեց, որ նախ դեռ չգիտեն, թե բացի Նիկոլ Փաշինյանից քանի թեկնածու կառաջադրվի:

Նա կրկին նշեց, որ կքննարկեն բոլոր թեկնածուների ծրագրերը և նոր որոշում կկայացնեն:

Դիտարկմանը, թե խմբակցությունը միասնակա՞ն կքվեարկի, Էդուարդ Շարմազանովը պատասխանեց. «Կա կուսակցական կարգապահություն, որը ենթադրում է՝ կուսակցությունը պետք է լինի միասնական, բայց միևնույն ժամանակ Սահմանադրությամբ պատգամավորը կաշկանդված չէ իր մանդատով և իր քվեարկությամբ, և քվեարկում է իր խղճին համապատասխան: Իհարկե կուսակցական կարգապահությունը պահանջում է, որ յուրաքանչյուր խմբակցություն կքվեարկի միասնական,  բայց նորագույն Հայաստանի պատմության մեջ մենք բազմաթիվ անգամներ ենք տեսել դեպքեր, երբ տարբեր մարդիկ տարբեր ձևեն քվեարկում: Դրա համար հիմա չեմ ուզում մեկնաբանություններ անել, բայց իմ կարծիքով՝ ճիշտը միասնական որոշման գալն է, սակայն այդ որոշումը պետք է լինի ոչ թե վերևից իջեցված հրահանգ, այլ՝ մեր բոլորիս քննարկումների արդյունք»:

Էդուարդ Շարմազանովը նշեց, որ այս պահից սկսում են քննարկումները խմբակցությունում, իսկ մինչև մայիսի 30-ը 18:00-ն առաջադրումներ դեռ կարող են լինել: Ըստ նրա՝ մինչև քվեարկության օրը կամ հենց քվեարկության օրը խմբակցության ղեկավարը կհայտարարի թե ինչպես է ՀՀԿ-ն  քվեարկելու:

Հարցին, թե հնարավո՞ր է ՀՀԿ-ն պաշտպանի Գագիկ Ծառուկյանի թեկնածությունը՝ հատկապես, որ  «Ծառուկյան» դաշինք խմբակցությունից ասել են՝  նա վարչապետի լավ թեկնածու է, ՀՀԿ մամուլի խոսնակը նորից կրկնեց, երբ բոլոր թեկնածուները առաջադրվեն, այդ ժամանակ կքննարկեն և իրենց որոշումը կներկայացնեն: