Փաշինյանը շնորհակալություն հայտնեց Բաբլոյանին՝ լարված պահերին հավասարակշված դերակատարում ունենալու համար
«Ծառուկյան» խմբակցության պատգամավոր Լուիզա Սարգսյանը կառավարության հետ հարցուպատասխանի ժամանակ վարչապետի պաշտոնակատար Նիկոլ Փաշինյանից խնդրեց մեկնաբանել, թե «Չար տնակը» հեքիաթի հերոսների կերպարները ստեղծելիս ում հետ է նրանց նմանեցրել։
«Երեխաները ընթերցում են, և նրանց մոտ անընդհատ հարցեր են ծագում, նրանք վստահ են, որ այնտեղ ալեգորիայի լեզվով խոսել եք հեղափոխության մասին, ուզում են համոզված լինել՝ արդյոք կուղբի կերպարը ձեր կերպարն է, չար տնակի կերպարը ՀՀԿ-ն է, իհարկե հեքիաթի վերջում չար տնակը լաց է լինում, և այդ գետակը բացատներին օգուտ է բերում, բայց ինչպե՞ս եք տեսնում այս հեքիաթի շարունակությունը»,- հարցրեց պատգամավորը։
Նիկոլ Փաշինյանն ասաց, որ հեքիաթի մասինասելիքները շատ են. «Այն գրվել է փետրվարի վերջին-մարտի սկզբին, այդ ժամանակաշրջանն արդեն իսկ հուշում է, որ ես մտածում էի առաջիկա անելիքների մասին։ Այո, այնտեղ կան այլաբանություններ, դրանք շատ ուղղակի չեն, բայց կան նաև ուղղակի այլաբանություններ, որոնք ինստիտուցիոնալ են, քան թե անձնական: Երևի հիմա առիթ է ասեմ՝ չար տնակը պայմանական ասված կաբինետն է, որը հաճախ սովորություն ունի մարդկանց կլանել, ջնջել նրանց հիշողությունը, արժեզրկել նրանց արժեքները: Եթե այսքան անկեղծացա, չար տնակ ասելով՝ նկատի եմ ունեցել ԱԺ-ն, քանի որ առաջիկա անելիքների մասին էի մտածում, մտածում էի, որ ԱԺ խմբակցության ղեկավարի աշխատասենյակը կերել է իմ հիշողությունը, ուտում է իմ արժեքները, ինձ շեղում իմ քաղաքական առաքելությունից, և ես ուրախ եմ, որ մենք կարողացանք այդ տնակի ճիրաններից դուրս պրծնել և վերադառնալ այն առաքելությանը, որով ես սկսել եմ իմ քաղաքական առաքելությունը: Հույս ունեմ, որ վարչապետի կաբինետը այդպիսի դերակատարում չի ունենա»։
Փաշինյանը նշեց, որ այդ գիրքը միշտ իր գրասեղանին է:
ԱԺ նախագահ Արա Բաբլոյանն էլ արձագանքեց. «Հեքիաթի մենք Ձեզ հետ միասին խոսել ենք, երբեք չէի պատկերացնում, որ խոսքը վերաբերում է Ազգային ժողովին: Գտնո՞ւմ եք, որ վեցերորդ գումարման խորհրդարանը ինչ-որ նշանակություն ունեցավ մեր երկրի, պետության և պատմության համար»։
Նիկոլ Փաշինյանը պատասխանեց, որ միանշանակ է՝ վեցերորդ գումարման ԱԺ-ն պատմական է։
«Այս փոփոխությունների խաղաղ, թավշյա բնույթը բոլորովին էլ դրանցում ներգրավված մի կողմի վաստակը, ձեռքբերումը չէ: Այո, ես այս ամբիոնից էլ ասել եմ, որ մենք կարողացանք պրոցեսները տեղափոխել ԱԺ և դրանց տալ լուծում: Այս ամենի վերաբերյալ իմ գնահատանքը արտահայտել եմ վեցերորդ գումարման պատգամավորների և նախագահության վերաբերյալ: Կարծում եմ՝ սա մի առաքելություն է, որը պատմության մեջ դեռ կգնահատվի»,- ասաց վարչապետի պաշտոնակատարը։
Փաշինյանը շնորհակալություն հայտնեց նաև ԱԺ նախագահ Արա Բաբլոյանին՝ գործունեության ու լարված պահերին կառուցողական ու հավասարակշռված դերակատարում ունենալու համար:
«Ես այդ պահվածքը շատ բարձր եմ գնահատում, ուզում եմ Ձեզ շնորհակալություն հայտնել դրա համար։ Այս ԱԺ-ում, այո, կառավարման ու տնտեսվարման ձևի մեջ տեղի են ունեցել փոփոխություններ, որոնք տեսել եմ որպես ԱԺ պատգամավոր», - ամփոփեց Փաշինյանը։