«ՅՈՒՆԵՍԿՕ-ն որպես կառույց չափազանց կարևոր է մեզ համար». Երևանում մեկնարկեց մշակութային միջազգային կոնֆերանսը
«ՅՈՒՆԵՍԿՕ-ն որպես կառույց չափազանց կարևոր է մեզ համար. միջազգային խոշորագույն միակ կառույց է, որն իր ամենօրյա պաշտպանության տակ է վերցրել մշակութային խնդիրները, մեր ինքնաարտահայտման, ազատության իրավունքը, մշակութային ժառանգության պահպանման խնդիրը»: Երևանում՝ Մատենադարանում, մեկնարկած «Մշակութային քաղաքականություն, քաղաքականություն մշակույթի համար. մշակույթի դերը «Ետ-2015» զարգացման օրակարգում» խորագրով միջազգային կոնֆերանսի բացման խոսքում ասաց ՀՀ մշակույթի նախարար Հասմիկ Պողոսյանը:
Նշենք, որ կոնֆերանսը նվիրված է ՅՈՒՆԵՍԿՕ-ի հիմնադրման 70-ամյակին:
Նախարարը կարևորեց այն հանգամանքը, որ կոնֆերանսն անցկացվում է հենց Մատենադարանում, որտեղ պահպանվում են ոչ միայն հայերեն ձեռագերեր, այլ նաև արաբատառ և այլ լեզուներով, որոնք հենց հայերի ձեռքով հավաքագրվել են այստեղ ու այդ գործընթացը շարունակվում է:
«Հենց այս կառույցն է, որ ընդգրված է ՅՈՒՆԵՍԿՕ-ի՝ աշխարի հիշողության ցանկում: Մեր ներկայությունը գիտական այս հասատատությունում մեզ ավելի պարտավորեցնում է լուծել այն խնդիրներ, որոնք ծառացած են այսօր մշակույթի առջև»,- ասաց Հասմիկ Պողոսյանը:
Երևանում ընթացող եռօրյա կոնֆերանսին մասնակցում են պատվիրակներ 45 երկրից և միջազգային կազմակերպություններից: Այդ օրերին կքննարկվեն մշակույթի ոլորտում ՅՈՒՆԵՍԿՕ-ի կոնվենցիաներին միացած երկրների փորձը մշակութային քաղաքականության շրջանակներում: Կոնֆերանսի շրջանակներում կայանալու են. «Մշակույթի դերը կայուն զարգացման գործում 2015թ. օրակարգից հետո. նոր իրականություն և հեռանկարներ» խորագրով լիագումար և «Մշակույթի ապագան. Ապագայի մշակույթը» եզրափակիչ նիստերը, ինչպես նաև թվով 3՝ «Մշակութային ժառանգությունը` որպես մարդկային համախմբման և հոգևոր հաղորդակցման գործոն», «Մշակութային բազմազանությունը միջմշակութային երկխոսության և կայուն զարգացման երաշխիք», «Ոչ նյութական մշակութային ժառանգությունը փոփոխվող աշխարհում» թեմատիկ սեղանները: Նիստին արտերկրից կմասնակցեն ՅՈՒՆԵՍԿՕ-ի, ԵՄ և տարբեր երկրների մշակույթի նախարարներ ու փոխնախարարներ, Հայաստանում հավատարմագրված դիվանագիտական առաքելությունների և միջազգային կազմակերպությունների ղեկավարներ, օտարերկրյա պետությունների մշակութային կենտրոնների ներկայացուցիչներ, ոլորտի փորձագետներ:
Կոնֆերանսին մասնակցում են ԱՊՀ Գործադիր կոմիտեի ներկայացուցիչներ, ԱՊՀ երկրների մշակույթի նախարարներ և այլ բարձրաստիճան հյուրեր, այդ թվում՝ Իրանի մշակույթի և իսլամական առաջնորդման նախարար Ալի Ջանաթին, Վրաստանի մշակույթի և հուշարձանների պահպանության նախարար Միխեիլ Գիորգաձեն, ՅՈՒՆԵՍԿՕ-ում Վատիկանի մշտական ներկայացուցիչ Մոնսինյոր Ֆրանչեսկո Ֆոլոն, ՅՈՒՆԵՍԿՕ-ում Ֆրանկոֆոն երկրների խմբի նախագահ և Լիբանանի մշտական ներկայացուցիչ Խալիլ Քարամը, Շրի Լանկայի մշակույթի նախարար Հանդիմիթրա Էկանայակեն, Հայաստանի գիտությունների ազգային ակադեմիայի հնագիտության և ազգագրության ինստիտուտի առաջատար հետազոտող, պատմական գիտությունների դոկտոր Հարություն Մարությանը, Բանգլադեշի մշակութային հարաբերությունների նախարար Ասադուզաման Նուռը, Էստոնիայի մշակույթի նախարարության աշխատակազմի ղեկավարի տեղակալ Աննե Լի Ռեյմաան, Բելառուսի մշակույթի ինստիտուտի մշակութային ժառանգության պահպանման բաժնի պետ Ալլա Ստաշկևիչը, ՀՀ ԳԱԱ արվեստի ինստիտուտի արվեստագիտության դոկտոր, պրոֆեսոր Լիլիթ Երնջակյանը, Հովհ. Շարամբեյանի անվան ժող. ստեղծագործությունների կենտրոնի գիտաշխատող Տաթև Մուրադյանը, «Մշակութային ռենեսանս» հիմնադրամի տնօրեն Արմեն Մարտիրոսյանը, «Զինված ընդհարման դեպքում մշակութային արժեքների պաշտպանության մասին» կոնվենցիայի միջկառավարական կոմիտեի նախագահ, Հունաստանի արտաքին գործերի նախարարության աշխատակազմի ավագ իրավախորհրդատու Արտեմիս Պապատանասիուն, Աֆղանստանի մշակույթի նախարար Աբդուլ Բարի Ջահանին, Սիրիայի Արաբական Հանրապետության մշակույթի նախարար Իսսամ Խալիլը, Հայաստանի ՅՈՒՆԵՍԿՕ-ի ազգային հանձնաժողովի գլխավոր քարտուղար Վահրամ Կաժոյանը, ՀՀ էկոնոմիկայի նախարարի տեղակալ Սերգեյ Ավետիսյանը, Ռումինիայի մշակույթի նախարարության պետական քարտուղար Բոգդան Ստանոևիչը, ԻԿՕՄՕՍ/Հայաստանի կազմակերպության անդամ Էմմա Հարությունյանը, «Կիևի Սուրբ Սոֆիա» արգելոց-թանգարանի արտաքին կապերի վարչության պետ, Համաշխարհային ժառանգության կոնվենցիայի կիրարկման պատասխանատու Մարիա Բույուկլին (Ուկրաինա), ԱՄԱՓ մարդկային ռեսուրսների զարգացման ՀԿ հիմնադիր և գործադիր նախագահ Ռիչարդ Նեյը (Հայաստան), ԻԿՕՄ/Ռուսաստանի կազմակերպության գործադիր տնօրեն Աֆանասի Գնեդովսկին և այլք:
Կոնֆերանսն աշխատանքները կավարտի հռչակագրի ընդունմամբ, որը համահունչ կլինի կոնֆերանսի հայեցակարգին և ՅՈՒՆԵՍԿՕ-ի դավանած սկզբունքներին: Կոնֆերանսի կազմակերպման առիթով պատրաստվել է «Հայաստան-ՅՈՒՆԵՍԿՕ. մշակույթ» խորագրով գիրքը: Բարձրաստիճան հյուրերը շրջայցեր կկատարեն Երևան քաղաքում, կծանոթանան հայկական մշակութային արժեքների և տեսարժան վայրերի հետ:
Լրահոս
Տեսանյութեր
Բագրատ Սրբազանի գլխավորած երթը դեպի Երևան շարունակվում է
