Քննարկվել են Հայաստան-Իրան տնտեսական կապերի առավել ամրապնդմանն ուղղված հարցեր

Տնտեսություն 20:33 29/07/2016 Հայաստան

Քննարկվել են Հայաստան-Իրան տնտեսական կապերի առավել ամրապնդմանն ուղղված հարցեր

Հուլիսի 25-27-ը, Իրանի Իսլամական Հանրապետության էներգետիկայի նախարար Համիդ Չիթչիանի հրավերով, Թեհրանում էր գտնվում ՀՀ էներգետիկայի և բնական պաշարների նախարար Լևոն Յոլյանի գլխավորած պատվիրակությունը: Այս մասին հայտնում են ՀՀ-ում էներգետիկայի և բնական պաշարների նախարարության մամուլի ծառայությունից:

ԻԻՀ նախագահի առաջին տեղակալ Էսհաղ Ջահանգիրիի հետ հանդիպման ընթացքում զրուցակիցները գոհունակությամբ ընդգծել են հայ-իրանական քաղաքական հարաբերությունների բարձր մակարդակը՝ նշելով տնտեսական համագործակցության հետագա խորացման անհրաժեշտությունը:

ԻԻՀ արդյունաբերության, հանքերի և առևտրի նախարար Մոհամմադռեզա Նեմաթզադեի հետ հանդիպմանը քննարկվել են Հայաստանի՝ ԵՏՄ անդամակցությամբ պայմանավորված երկկողմ տնտեսական հարաբերությունների զարգացման նոր հեռանկարների, Իրան-ԵՏՄ համագործակցության շրջանակներում Հայաստանի դերակատարության, Հայաստան-Իրան տնտեսական կապերի առավել ամրապնդման և բազմաթիվ այլ հարցեր:

Նախարար Յոլյանը զրուցակցին ներկայացրել է Հայաստանում հանքարդյունաբերության ոլորտի ներդրումային հնարավորությունները։

ԻԻՀ նավթի նախարար Բիժան Զանգանեի հետ հանդիպման ընթացքում քննարկվել են էներգետիկ ոլորտում հայ-իրանական հարաբերությունների ընդլայնման հեռանկարները: Զրուցակիցները համակարծիք են եղել էներգտիկ բնագավառում համագործակցության ընդլայնման առումով։ Այս համատեքստում շեշտվել է իրավապայմանագրային դաշտի ընդլայնման կարևորությունը:

Նախարար Յոլյանի գլխավորած պատվիրակությունը այցելել է «MAPNA» արդյունաբերական խմբի ձեռնարկություններ և ծանոթացել ընկերության արտադրական և գիտահետազոտական հնարավորություններին:

Թեհրանում Լևոն Յոլյանն այցելել է «Արարատ» մարզավան, ուր հանդիպում ունեցավ իրանահայ համայնքի ներկայացուցիչների հետ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: