Ձեր վստահելի աղբյուրը

«Խոշոր հարկ վճարողների հարկային տեսչությունում հաշվառված 521 հարկ վճարողներից դեկտեմբերի 1-ի դրությամբ ռիսկային են գնահատվել 296-ը:  Մեր դիտարկման արդյունքում՝ 296 ձեռնարկությունում ունենք ստվեր, որը եթե վարչարարության արդյունքում  չստացվի, ապա խիստ միջոցառումների իրականացման միջոցով բերելու ենք հարկային դաշտ,- լրագրողների հետ հանդիպմանն ասաց Պետական եկամուտների կոմիտեի նախագահ Վարդան Հարությունյանը:

Նրանց մոտ միջին ամսական ստվերը գնահատվել է 3  միլիարդ 548 միլիոն 700 հազար դրամ, որը կազմում է հարկ վճարողների կողմից վճարված միջին ամսական հարկերի (առանց ԵԱՏՄ մուտքերի) 48.4 տոկոսը, իսկ ԽՀՎ ՀՏ-ում հաշվառված բոլոր հարկ վճարողների կողմից վճարված միջին ամսական հարկերի 11.1 տոկոսը:

«2017 թվականի աշխատանքային հենց առաջին օրից սկսած մենք հետևողական ստուգումներ ենք սկսելու այս ձեռնարկություններում, որպեսզի նշված թիվը բերենք պետական բյուջե»,- նշեց ՊԵԿ նախագահը:

Վ.Հարությունյանն ասաց, որ առանձնացվել են նաև առավել ռիսկային տնտեսվարողները: Նա տեղեկացրեց, որ 2017 թվականից իրենք հրապարակելու են ինչպես օրինապահ հարկ վճարողների ցանկը, այնպես էլ այն ընկերությունների, ովքեր փորձում են խուսափել հարկային, սպիտակ դաշտում աշխատելուց:

«Պետք է վերջիվերջո բիզնեսը գիտակցի, որ հարկ վճարելը, սպիտակ դաշտում աշխատելը պատվաբեր է, ուշ թե շուտ բոլորը պետք է գործեն սպիտակ դաշտում»,- ընդգծեց ՊԵԿ նախագահը:

Վ. Հարությունյանի խոսքով՝ երկրի ղեկավարության կողմից ունի խիստ հանձնարարություն և, լինելով պատասխանատու մարդ,  հասարակության մոտ նաև պարտավորվում է, որ հանձնարարությունները կատարվելու են:

«Առաջին քայլը մեր համակարգը  կաշառակեր ու անառողջ էլեմենտներից մաքրելն է: Արդեն սկսվել է: Վերջին 2 ամսում 50 աշխատակից ազատվել է աշխատանքից ինչ-ինչ պատճառներով: Այդ պրոցեսը լինելու է շարունակական: Հասնելու ենք նրան, որ թե ՊԵԿ աշխատակիցների հանդեպ հավատը վերականգնվի մեր հասարակության մոտ, թե պատվաբեր լինի այստեղ աշխատելը: Ուզում եմ հնչեցնել, որ ՊԵԿ այսօրվա ղեկավարը, աշխատակիցներն ունեն այդ կամքը: Ովքեր չունեն, չեն կարող մեզ հետ երկար ճանապարհ գնալ:  Այն առողջ մասսան, որն ունի ցանկություն ուղղվելու, շտկվելու, աշխատելու այսօրվա պահանջներին համաձայն, մենք միայն ուրախ կլինենք շարունակել նման մարդկանց հետ մեր գործունեությունը:

Ինքներդ լավ գիտակցում եք, որ մեկ օրվա գործ չէ: Մի օրում ամեն ինչը շտկել, փոխել, հասնել այն արդյունքին, որը դուք ուզում եք մեկ ամսում տեսնել, իրական չէ ուղղակի: Ժամանակ է պետք: Վստահ ասում եմ, որ այդ ամեն ինչին մենք կհասնենք»,- ասաց Վարդան Հարությունյանը:

Նա նշեց, որ պետք է ոչ միայն ՊԵԿ աշխատակիցներից պահանջել անկաշառ, առանց հովանավորչության էլեմենտների դրսևորմամբ աշխատանք, նաև հասարակությունը, գործարարները պետք է հասկանան, որ իրենց օգնությունն էլ շատ անհրաժեշտ է.
«Հասարակության օգնությունն անհրաժեշտ է, որպեսզի նման երևույթները բացահայտեն, իրազեկեն: Գործարար աշխարհից ակնկալում եմ, որ վերջապես հասկանալու են, որ, իրոք, պատվաբեր է հարկ վճարելը, ոչ թե հովանավորչությամբ, կաշառք տալով խնդիրներ լուծելը:
Լինելով գործարար աշխարհից այստեղ եկած անձնավորություն՝ շատ լավ գիտակցում եմ թե բիզնեսի հոգեբանությունը, խնդիրները, թե այդ խնդիրները լուծելու ձևերը: Խնդրում եմ իմ նախկին գործընկերներին, որ իրենք էլ վերափոխվեն: Հավաստիացնում եմ ձեզ, որ հասարակության մեջ  արտոնյալ ընկալում ունեցող մարդիկ ձեր աչքի առաջ վերափոխվելու են, գործելու են սպիտակ դաշտում: Այլընտրանք չկա: Պետք է բոլորս իրար հետ պայքարենք: 

Ինձ համար անհասականալի երևույթ է, մի քանի դեպք արդեն արձանագրվել է, որ ստուգումների արդյունքում ի հայտ եկած գումարները, որոնք պետք է ի օգուտ բյուջեի հավաքագրվեն, առաջարկում են գումար, որի դիմաց ակնկալում են քիչ գրված որևէ ակտ: Երբ մեր աշխատակիցն ասում է, որ այդպիս բան չի կարելի, պետք է այս գումարը վճարվի բյուջե, սկսում են ընդդիմանալ, ուղիներ փնտրել իմ մոտ գալու: Չի լինելու նման մոտեցում: Մեր աշխատակիցները պատրաստ են այսօր կտրուկ փոփոխության:

Հարցնում են՝ ինչպե՞ս եք պատկերացնում, որ 50-60 հազար դրամ աշխատավարձ ստացող հարկային տեսուչի մոտիվացիան: Ակնկալում եմ, որ մեր երկրում  2000-2500 հայրենասեր մարդ կլինի, որոնց մոտիվացիան լինելու է երկրում ինչ-որ բան փոխելը, իրենց երեխաների ապագան կերտելը, ոչ թե միայն աշխատավարձ ստանալը: Համոզված եմ, որ այդ մոտիվացիայով աշխատանքի դեպքում շատ մոտ ապագայում ունենալու ենք հաջողություններ, բարձր աշխատավարձ, եթե, իհարկե, բյուջեի եկամուտները մենք ավելացնենք մեր աշխատանքի շնորհիվ, ստեղծենք հավասար դաշտ բիզնեսի համար»:

Վ. Հարությունյանը նշեց, որ գործարարի հոգաբանությունն է՝ եթե ամբողջ հարկերը վճարի, ապա շահույթ չի ստանա: ՊԵԿ նախագահի խոսքով՝ միգուցե այն դեպքում, եթե բիզնեսը հավասար դաշտում չի գործում:

«Բայց եթե ես այսօր հնչեցնում եմ և պարտավովում, որ շատ կարճ ժամանակահատվածում տեսնելու եք փոփոխություններ,  նաև բիզնեսը պետք է կարողանա այնպես դասավորի իր գործը, որպեսզի շահույթ ստանա ոչ թե հարկերը թաքցնելու հաշվին, այլ շահույթ ստանա իր գիտելիքների, ունեցած բիզնես հոտառության հաշվին»,- ասաց ՊԵԿ նախագահ Վարդան Հարությունյանը: