Ձեր վստահելի աղբյուրը

Հաջորդ երկուշաբթի՝ հոկտեմբերի 10-ին կմեկնարկի ԵԽԽՎ աշնանային նստաշրջանը, այն կշարունակվի չորս օր։

Panorama.am-ին ԵԽԽՎ-ից հայտնում են, որ նստաշրջանի վերջնական օրակարգը կհրաապարակվի երկուշաբթի, սակայն կան թեմաներ, որոնց քննարկման պահանջ է եղել։ Վեհաժողովը կքննարկի, արդյոք ցանկանում է քննարկել այ թեմաները, ապա կորոշեն, թե երբ տեղի կունենան քննարկումները։

Առաջարկված թեմաներից մեկն էլ Հայաստանի ու Ադրբեջանի միջև ռազմական գործողություններն են։

ԵԽԽՎ աշնանային նստաշարջանում քննարկելու համար առաջարկել են նաև հետևյալ թեմաները՝ Եվրոպան Ռուսաստանի կողմից Ուկրաինայի վրա հարձակումից կես տարի անց, Պարենի անվտանգությունը Եվրոպայում, հացահատիկի արտահանում Ուկրաինայի նավահանգիստներով։
Որպես հրատապ թեմա առաջարկվել է քննարկել «Ռուսաստանի վերջին անմարդկային գործողությունները»։

Նշենք, որ ԱԺ նախագահ Ալեն Սիմոնյանի՝ հոկտեմբերի 3-ի կարգադրությամբ 
 Եվրոպայի խորհրդի խորհրդարանական վեհաժողովի (ԵԽԽՎ) նստաշրջանի չորրորդ մասի աշխատանքներին մասնակցելու համար 2022 թվականի հոկտեմբերի 9-15-ը Ստրասբուրգ են գործուղվել ԵԽԽՎ-ում Ազգային ժողովի պատվիրակության ղեկավար, Ազգային ժողովի նախագահի տեղակալ Ռուբեն Ռուբինյանը, ԵԽԽՎ-ում պատվիրակության անդամներ, Ազգային ժողովի պետական-իրավական հարցերի մշտական հանձնաժողովի նախագահ Վլադիմիր Վարդանյանը, Ազգային ժողովի արտաքին հարաբերությունների մշտական հանձնաժողովի նախագահ Էդուարդ Աղաջանյանը, , Ազգային ժողովի պատգամավորներ Սոնա Ղազարյանը, Արուսյակ Ջուլհակյանը, Արմեն Գևորգյանը, Արմեն Ռուստամյանը և Հայկ Մամիջանյանը։

Հայաստանի անվտանգության խորհրդի՝ սեպտեմբերի 19-ի ընդունած հայտարարության համաձայն, 2022 թվականի սեպտեմբերի 12-ի լույս 13-ի գիշերը Ադրբեջանի զինված ուժերը լայնածավալ ագրեսիա են սկսել Հայաստանի Հանրապետության ինքնիշխան տարածքի նկատմամբ՝ խոշոր տրամաչափի զինատեսակների, հրետանու, հրթիռային համակարգերի, անօդաչու թռչող սարքերի կիրառմամբ:

Ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում՝ զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող: Առկա են ապացույցներ հայաստանցի գերեվարված կամ զոհված զինծառայողներին ադրբեջանցիների կողմից խոշտանգումների ենթարկելու, անդամահատելու, այդպիսով ապօրինի կերպով կյանքից զրկելու դեպքերի վերաբերյալ:

Ադրբեջանի զինված ուժերի կողմից թիրախավորվել են 36 բնակավայրեր, այդ թվում` Գորիս, Սիսիան, Կապան, Ջերմուկ, Վարդենիս, Տեղ, Գեղամասար համայնքները, ինչի հետևանքով մասնակի կամ ամբողջական ավերվել են 192 տուն, 3 հյուրանոց, 2 դպրոց, 1 բժշկական հաստատություն, 1 հանդիսությունների սրահ, 4 անասնագոմ: Վնասվել է 7 էլեկտրական ենթակառուցվածք, 5 ջրային ենթակառուցվածք, 3 գազամուղ, 1 կամուրջ, 2 ավտոճանապարհ, 1 փողոց: Թիրախավորվել են 2 շտապօգնության մեքենա, 4 անձնական օգտագործման ավտոմեքենա:

Ադրբեջանի զինված ուժերը մի քանի ուղղություններով մխրճվել են Հայաստանի Հանրապետության ինքնիշխան տարածք: Հայաստանի Զինված ուժերի համառ և հերոսական դիմադրության և միջազգային հանրության ներգրավման շնորհիվ Ադրբեջանի հարձակումը կասեցվել է, սակայն ռազմաքաղաքական իրադրությունը շարունակում է մնալ լարված: