Ձեր վստահելի աղբյուրը

Ինչպես ցանկացած երկրում, Հայաստանում էլ կան դրական և բացասական կողմեր,- Երևանում լրագրողների հետ հանդիպմանն ասաց ամերիկահայ գրող, հասարակական ակտիվիստ, «Կալիֆորնիա կուրիեր» (The California Courier) թերթի գլխավոր խմբագիր և հրատարակիչ Հարութ Սասունյանը:

Նա թվարկեց անկախության տարիների մի քանի ձեռքբերումները:  Նախ՝  Արցախի անկախացում,  որը ոգևորեց ողջ հայությունը, և բոլորը փորձում են այդ անկախությունը պահել,  հասնել նրան, որ միջազգայնորեն ճանաչվի:

Ըստ Հ. Սասունյանի՝ թեպետ Հայաստանը 25 տարի երկու կողմից շրջափակման մեջ է, հայ ժողովուրդը կարողացավ հնարամիտ ձևով միջոցներ գտնել և գոյատևել, որոշ չափով տնտեսական աճ արձանագրել: 

«Հավանաբար եթե այլ երկրներ նման վիճակում լինեին, վաղուց արդեն չէին կարող գոյատևել»,- ընդգծեց նա:

Խոսելով բացասական երևույթների մասին՝ Հ. Սասունյանը նշեց. «Առաջինը՝  սարսափելի ահավոր արտագաղթն է, որը հավանաբար անկախ Հայաստանի պատմության մեջ  գոյատևման ամենամեծ  վտանգն է: Հնարավոր չէ փոքր մի պետություն ավելի փոքրանա ու փոքրանա:  Այդ դեպքում պակասում է և մարդկային ուժը, և բանակը, և տնտեսական ու քաղաքական ուժը»:

Ըստ նրա, մարդ պետք է առնվազն  ապրուստի տարրական պայմաններ ունենա՝ աշխատանք, եկամուտ, որպեսզի երեխաներին կարողանան մեծացնել, ուղարկել դպրոց, արժանավայել ապրել:

«Ժողովրդի մեծամասնության մոտ տակավին բացակայում է»,- ընդգծեց Սասունյանը:

Հասարակական գործիչը նաև նշեց, որ Հայաստանն ունի 3 միլիոն բնակիչ, աշխարհում ապրում է 7 միլիոն հայ:

«Հակառակ Հայաստան-սփյուռք կապերի ամրապնդմանն ուղղված բոլոր փորձերին՝ ոչ մի մեծ հաջողության չենք հասել, հավանաբար կարողացել ենք  օգտագործել սփյուռքի ռեսուրսների միայն 5 տոկոսը»,- ասաց նա՝ հավելելով, որ կան միլիոնավոր հայեր, ովքեր Հայաստանում չեն եղել, կան հայեր, որոնք նույնիսկ չգիտեն, որ Հայաստանն արդեն 25 տարի է անկախ պետություն է:

Հ. Սասունյանի խոսքով՝ շատ քիչ սփյուռքահայեր են երկքաղաքացի:

«Չեմ կարող արդարացնել: Պետք է հսկա ջիգեր թափվեն, որպեսզի ավելի շատ սփյուռքահայեր երկքաղաքացի դառնան, քանի որ դա միայն փաստաթուղթ չէ, այլ անմիջական կապ՝ հոգևոր, անձական»,- նշեց նա: 

Ըստ նրա, Հայաստանում փոխվեց վարչապետ, խոսում է բարեփոխումների, փոփոխությունների մասին:

«Ամենաբարձր տեղերից հայտարարվում են, որ փոփոխություններ են լինելու, բարեփոխումներ են անհրաժեշտ: Եթե ասվում է, նշանակում է՝ խոստովանում են, որ ինչ-որ բան այն չէ ու պետք է բարեփոխել»,- ասաց Հ. Սասունյանը՝ հույս հայտնելով, որ նոր կառավարությունն կտանի աշխատանք, որի արդյունքում փոքր ձեռքբերումներ կնկատվեն: