Ձեր վստահելի աղբյուրը

«Բանակը մինչև երեկ, այսօր... Դաշնակցության տղերքն ու բազմաթիվ տղերք չեն իջնում սահմանից, ասում են՝ մենք տալու հայրենիք չունենք»,- «5-րդ ալիք» հեռուստաընկերության «Հարցազրույց» հաղորդման ժամանակ ասում է ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։

Նա նշում է՝ գիտենք, որ մեծ ծավալի պատերազմ է եղել, դժվարություններ են եղել։

«Երկրի ղեկավարի պարտականությունը նաև դա է, որ պետք է ճիշտ գնահատի վիճակը, հասկանա իր զինանոցը, բանակի կարողությունը, հնարավորությունները։  Եթե այս վիճակում էր, պետք է ունենար այդ վճռականությունը պատերազմը կանգնեցներ սկզբից, ավելի լավ դիրքային պայմաններում կլինեինք, ոչ թե հյուծեր, հասցներ կապիտուլյացիայի։

Բայց եթե դու այս ամբողջ ընթացքում անընդհատ իմիտացիա ես անում, որ կռվում ես, չի ստացվում, հանցագործություն է»,- ասում է ՀՅԴ-ական գործիչը։

Նրա խոսքով, եղել են անհասկանալի, անբացատրելի քայլեր, գործողություններ, որոնք շարք են, դրանք պետք է քննվեն, հասկանալ դրանց իրական պատճառները։

«Ինչ վերաբերում է Փաշինյանի ու նրա ընտանիքի գրառումներին, որ հաղթել ենք, վիրավորական է մեր ժողովրդին։ Ես՝ իբր Հայաստանի քաղաքացի, վիրավորվում եմ, որ իմ երկրի ղեկավարը իմ հետ վարվում է... Ո՞նց կարելի է։ Վերջապես ո՞ր երկրում ես ապրում։ 5000 տարվա պատմությոն ունեցող Հայաստանի ղեկավարն ես դու, չի կարելի այս ժողովրդին այսքան ձեռք առնել՝ հպարտ քաղաքացիներ, հպարտ քաղաքացիներ։ Հպարտ քաղաքացին այսօր պետք է չհանդուրժի այս իշխանությանը։ Նիկոլ Փաշինյանը այս ժողովրդին ղեկավարելու բարոյական, քաղաքական որևէ իրավունք չունի։ Սա ոչ միայն ստեղծված իրավիճակի գնահատականն է, այլ իր հեռանալը հնավորություն է իրական, իրենց ասած նոր ... Իրոք, արդեն եկանք, հասանք դրան, որ նոր Հայաստան կառուցենք, իսկ այդ նոր Հայաստանում Նիկոլ Փաշինյանն ու իր քաղաքական թիմը ոչ միայն տեղ չունեն, այլ պետք է պատասխան տան այս ամեն ինչի համար»,- ասում է Ի. Սաղաթելյանը։

Նա նշում է, որ հասարակությունը սկսել է հասկանալ, թե ինչ փաստաթուղթ է նա ստորագրել։ 

«Հասարակությունը խորը շոկի մեջ է։ Այս սարսափի, շոկի միջից ժողովուրդը դժվար է դուրս գալու։ Բայց պետք է չվհատվել։ Մենք ցեղասպանություն էլ ենք տեսել, ոտքի ենք կանգել, պետք է ոտքի կանգնենք, համախմբվենք, ազգային պետություն ստեղծենք՝ ուժեղ, հզոր իրական ու գնանք առաջ։ Այլընտրանք, այլ ճանապարհ չկա։ Այս դատարկ տակառների իշխանությունը պետք է հեռանա,   որպեսզի կարողանանք ստեղծել։ Թող որևէ մեկը չփորձի ասել իշխանության կռիվ է։ Հաջորդ իշխանության բեռը շատ ծանր է, Նիկոլի թողած ժառանգությունը սարսափելի է, բայց պետք է փոխենք այդ ժառանգությունը»,- ասում է ՀՅԴ ԳՄ ներկայացուցիչ Իշխան Սաղաթելյանը։