Ձեր վստահելի աղբյուրը

Հայ-թուրքական հարաբերությունները բարդ են, և Հայաստանը պետք է փորձի համադրել անցյալի բեռը, այսօրը, այս տարածաշրջանում խաղաղության ու կայունության մեջ ապրելու հրամայականը: Այսօր հայ-թուրքական հարաբերություններին նվիրված խորհրդարանական լսումների ժամանակ հայտարարեց Հայաստանի ԱԳ նախարար Վարդան ՕՍԿԱՆՅԱՆՆ ու հավելեց, որ անցյալի խնդիրները հնարավոր է լուծել, եթե լինեն դիվանագիտական նորմալ հարաբերություններ ու բաց սահմաններ: Սակայն, Թուրքիան, ըստ նրա, նախ ցանկանում է լուծել անցյալի հետ կապված բոլոր խնդիրները, որից հետո միայն պատրաստ է բացել Հայաստանի հետ սահմանը. դա նշանակում է նախապայմաններ առաջ քաշել: Հայաստանի ԱԳ նախարարի ներկայացմամբ, անգամ Եվրոպայում շատ երկրներ կան, որոնք խնդիրներ ունեն միմյանց հետ, սակայն նրանք չեն փորձում դրանք լուծել սահման փակելով ու նախապայմաններ դնելով:

Նա հայ-թուրքական հարաբերությունները բաժանեց մի քանի փուլերի: Ըստ այդմ, առաջին փուլում (1991-93 թվականներ) հայ թուրքական սահմանը բաց էր, սակայն Թուրքիան հրաժարվում էր դիվանագիտական հարաբերություններ հաստատել` պահանջելով Թուրքիայի սահմանների ճանաչում և ցեղասպանությունից հրաժարում:

Հիշեցնենք, որ այդ տարիներին և մինչև 1998 թվականը, Հայաստանը ցեղասպանության հարցն իր արտաքին քաղաքական օրակարգում չէր ընդգրկել:

Երկրորդ փուլում (1993-98 թվականներ), երբ ղարաբաղյան ճակատում հայկական ուժերը գրավեցին մի շարք տարածքներ, փակվեց Թուրքիայի հետ Հայաստանի սահման և առաջ քաշվեց երրորդ նահանջը` ազատել հիշյալ տարածքները: Երրորդ փուլում, որն ընդգրկում է 1998-2007 թվականները, հիշյալ երեք նախապայմանները մնացել են ուժի մեջ և ավելի են ուժգնացել, քանի որ Հայաստանի արտաքին քաղաքականության օրակարգում է հայտնվել ցեղասպանության խնդիրը:

ԱԳ նախարարի խոսքով, հիշյալ երեք նախապայմաններից ոչ մեկը «միջազգային տեսանկյունից» քննադատության չի դիմանում: Նախ, ըստ Օսկանյանի, Թուրքիան ԼՂ հակամարտության կողմ չէ չի կարող այդ առնչությամբ նախապայմաններ առաջ քաշել, երկրորդ. Ուժի մեջ են 1921 թվականի Կարսի ու Մոսկվայի պայմանագրերը, որտեղ ուրվագծված են մեր երկրների սահմանները և այդ առնչությամբ Թուրքիայի սահմանները ճանաչելու վերջինիս պահանջն անտեղի է: Ինչ վերաբերում է ցեղասպանության ճանաչման խնդրին, ինչպես նշեց ՀՀ ԱԳ նախարարը, այլ երկրների խորհրդարանների կողմից ցեղասպանության ճանաչումը նրանց ներքին գործն է և Հայաստանը չի միջամտում դրանց: