Միայն հանրային ճնշումն է ունակ այս իշխանություններին վերադարձնել իրականություն. Քրիստինե Վարդանյան
Հոկտեմբերի 17-ի ՏԻՄ ընտրություններից մի քանի արձանագրում կարելի է անել։ Ասուլիսում ասաց «Հայաստան» խմբակցության պատգամավոր Քրիստինե Վարդանյանը։ Նրա ներկայացմամբ, առաջին արձանագրումն այն է, որ իշխանությունը շարունակում է ոչ թե քայլերով, այլ թռիչքներով նահանջել ժողովրդավարությունից։
«Հայաստանում շատ ավելի վատ է ժողովրդավարության վիճակը, քան մինչև այս մարդկանց գալը։ Չնայած դրան, երկրորդ կարևոր արձանագրումը, այս իշխանությունը փորձելու է ամեն ձև այս ընտրություններում իրենց պարտությունն ու ֆիասկոն բացատրեն ու ներկայացնեն ժողովրդավարության հաղթանակ։
Ոչ, իրենք պարզապես տապալվել են, արել են ամեն ինչ, որ այսպիսի արդյունք չլինի, դրա համար չեն խորշել կիրառել բոլոր միջոցները, այդ թվում անօրինական, բայց անգամ այդպիսի ճնշումների դեպքում մարդիկ արտահայտել են իրենց կարծիքը, իրենց վերաբերմունքը։ Գորիսում մարդիկ իրենց քվեով պատասխանել են այն մեղադրանքներին, որոնք ներկայացված են Առուշ Առուշանյանին»,- ասաց ընդդիմադիր պատգամավորը։
Նա ընդգծեց, որ իշխանությունը, չնայած կիրառած բոլոր ճնշումներին, անօրինակություններին, ջախջախիչ պարտություն է տանում, ինչը ցույց է տալիս, որ երկրում ոչ միայն ճգնաժամը չի հանգուցալուծվել, այլ մարդիկ դեռևս դիմադրության ռեսուրսը չեն կորցրել, մարդիկ, նույնիսկ այս անմարդկային պայմաններում, գնացել ու իրենց կամքն արտահայտել են։
Երրորդ արձանագրումը, ըստ Ք. Վարդանյանի այն է, որ ՀՀ-ում չկա «Քաղաքացիական պայմանագիր» ուժ, Հայաստանում կա Նիկոլ Փաշինյանը, ով մարդկանց ինչ-որ քանակի դեռ կարողանում է խաբել, սակայն ամեն անգամ ավելի քիչ թվով մարդկանց, նաև գիտեն, որ խաբելու գործընթացն անվերջ չեն կարողանալու տանել։
Պատգամավորն ասաց, որ այսօր Հայաստանում կա միակ և ամենակարևոր օրակարգ՝ անվտանգության և Հայաստանի գոյության-չգոյության։ Նա նշեց, որ այս ընդդիմությունը ոչ միայն նախորդ, նաև ներկա իշխանություններից տարբերվում է ոչ պոպուլիստական լինելով և շատ ավելի լավ պատկերացնելով պետության հանդեպ ծառացած խնդիրները։
«Գուցե կարող էինք ամեն օր դատարանների դիմաց հավաքվել ու բարձրաձայնել մեր ազատազրկված պատգամավորների հարցը, բայց հասկանալով, թե Հայաստանն ինչ վիճակում է գտնվում, այդ դեպքում անվտանգային հարցերն են դառնում օրակարգային։ Երբ ասում ենք՝ հայրենիքը վտանգի մեջ է, հայրենիքը պետք է փրկել, անձնական բաները մի քիչ կողք են դրվում»,- ասաց Ք. Վարդանյանը։
Խոսելով ընդդիմության պայքարի գործիքակազմերի մասին, նա ասաց, որ ընդդիմությունը խորհրդարանը դիտարկում է պայքարի գործիքներից մեկը, բայց որևէ մեկը չի կասկածում, որ ելույթով, ինչ որ բառեր օգտագործելով, փաստեր բերելով այս իշխանությանը վերջը չի կարող տալ։
«Միայն հանրային ճնշումն է ունակ այս իշխանություններին վերադարձնել իրականություն և ի վերջո լուծել այս իշխանության հարցը։ Խնդիրն այդ հանրային ճնշումի ճիշտ կազմակերպումն է, այնպես չարվի, որ այդ հանրային ճնշումը մսխվի կամ որևէ այլ տեղ գնա, քանի որ հիասթափության նոր ալիքին մարդիկ էլ չեն դիմանա։
Իհարկե, հիմա կա հիասթափություն, մարդիկ վստահել են մեզ, ձայն են տվել մի հույսով, որ այս իշխանությունը օր առաջ կգնա։ Մեզ տված ձայնը իրականում մեկ պատգամ ունի՝ իշխանափոխություն։ Դա տեղի չի ունեցել, որը ցանկալի էր անել, բայց հնարավոր չի եղել կազմակերպել։ Արձանագրենք, որ այս ընթացքում չհասանք այնտեղ, ուր պետք էր հասնել, պետք է պայքարը շարունակել»,- ասաց «Հայաստան» խմբակցության պատգամավոր Քրիստինե Վարդանյանը։