Ձեր վստահելի աղբյուրը

«Մոտ մեկ տարի՝ 44-օրյա պատերազմից հետո, մենք հայտարարում ենք, որ պարտված իշխանությունը պարտավոր է հեռանալ հանուն Հայաստանի Հանրապետության ժողովրդի և հանուն Հայաստանի պետական շահի»,- Factor.am-ի հետ զրույցում ասել է ԱԺ «Պատիվ ունեմ» խմբակցության պատգամավոր, «Հայրենիք» կուսակցության նախագահ Արթուր Վանեցյանը:

Նա նշել է, որ այս իշխանություններն այս մեկ տարվա ընթացքում մեկ բան են արել՝ կառչած են մնացել աթոռներից, բոլոր քայլերը միտված են եղել իշխանությունը պահպանելուն,  որևէ մեկը չի մտածել Հայաստանի Հանրապետության և Արցախի Հանրապետության պետական շահի մասին և չեն կարողացել որևէ կերպ ապահովել երկարատև անվտանգային երաշխիքներ մեր երկրի համար:

«Նոյեմբերի 14-ի դեպքը հենց այն մասին է խոսում, որ չունենք անվտանգային համակարգ: Մենք ասում ենք՝ խարխլված է մեր անվտանգային համակարգը, բայց, ցավոք սրտի, պետք է փաստենք, որ չունենք  անվտանգային համակարգ»,- ասել է Արթուր Վանեցյանը:

Նա նշել է, որ Հայաստանում վերջին երկու տարում կա մեկ անձի իշխանություն և այդ պայմանում կարևոր չէ, թե ով է պաշտպանության նախարարը, Ազգային անվտանգության ծառայության տնօրենը:

«Կա մեկ անձի իշխանությունը: Այդ անձը Նիկոլ Փաշինյանն է և ով կլինի պաշտպանության նախարար կամ այլ կարևորագույն պաշտոն զբաղեցնող անձ, որևէ ական նշանակություն չունի՝ կա  Նիկոլ Փաշինյան և  ստեղծված իրավիճակի ամբողջ պատասխանատվությունը կրում է Նիկոլ Փաշինյանը:

Նիկոլ Փաշինյանը պետք է ազնվորեն խոստովանի, որ չի տիրապետում իրավիճակին, չի կարողանում կատարել իր պարտականությունները, հանձնի իշխանությունը և հեռանա: Դա կլինի ամենաազնիվ ճանապարհը»,- ասել է ընդդիմադիր պագամավորը:

Արթուր Վանեցյանի խոսքով, Նիկոլ Փաշինյանին հեռացնող-չհեռացնողը Հայաստանի ժողովուրդն է, ընդդիմությունը պետք է գեներացնի այդ դժգոհությունը, այդ ալիքը և հասնի  Փաշինյանի հրաժարականին:

«Հայաստանի Ազգային ժողովում ներկայացված երկու ընդդիմադիր խմբակցությունները հայտարարել են՝ մեր օրակարգում որևէ բան չի փոխվել: Մեր օրակարգում է այս կապիտուլյանտ իշխանություններին օր առաջ հեռացնելը: Հիմա ինչ ճանապարհներով, ինչ ժամկետներում՝ ժամանակը ցույց կտա»,- նշել է նա:

Արթուր Վանեցյանն ընդդիմությանը չվստահողներին խորհուրդ է տվել ստանձնել այդ պարտականությունը և փորձեն հեռացնել Փաշինյանին. «Հավատացեք՝ ես լինելու եմ այն անձանցից մեկը, ով  կանգնած է  լինելու առաջին շարքերում ցանկացած այն ուժի կողքը, որը կկարողանա գեներացնել այդ շարժումը»:

Նա նշել է, որ ինքը միշտ է պատրաստ դուրս գալ փողոց, սակայն պետք է հասկանալ արդյունավետություն կլինի՞, թե՞ ոչ. «Եթե հիմա դուրս գանք փողոց և չստանանք այն արդյունքը, որի համար դուրս ենք եկել, հերթական անգամ հիասթափեցնելու ենք մեր հանրությանը»: