Ձեր վստահելի աղբյուրը

Դերասան Վարդան Պետրոսյանի գործով վերաքննիչ դատարանը չի բավարարել տուժող կողմի փաստաբան Ռուբեն Բալոյանի խնդրանքը՝ իր կողմից ներկայացրած վերաքննիչ բողոքը քննել վերաքննության կարգով և որոշել է բողոքի քննությունն իրականացնել վճռաբեկության կարգով: Panorama.am-ի հետ զրույցում ասաց Վ. Պետրոսյանի փաստաբան Նիկոլայ Բաղդասարյանը:

Հիշեցնենք, որ դերասան Վարդան Պետրոսյանի գործով վերաքննիչ դատարանում առաջին նիստը նշանակված է ապրիլի 1-ին: Վերաքննիչ բողոք է ներկայացրել և մեղադրող դատախազ Ա. Սարգսյանը՝ պահանջելով ավելի խիստ պատիժ նշանակել, և տուժող կողմի փաստաբան Ռուբեն Բալոյանը՝ նույն պահանջով, ինչպես նաև ամբողջությամբ բավարարել տուժող Տաթևիկ Հակոբյանի առողջությանը պատճառված վնասի մասով ներկայացված հայցապահանջը:

Ն. Բաղդասարյանի ներկայացմամբ, այն դեպքում, երբ գործը քննվում է վերաքննության կարգով, եթե բողոքը ներկայացնողը հարգելի պատճառով չի ներկայանում դատական նիստի, նիստը պետք է հետաձգվի, իսկ վճռաբեկության կարգով քննելու դեպքում՝ նիստը չի հետաձգվի: Վերաքննության կարգով քննելիս՝ ապացույցներն են հետազոտվում, վճռաբեկության կարգով քննելու դեպքում՝ ոչ:

Ըստ նրա, վճռաբեկության կարգով քննելիս նույն վճռաբեկ դատարանի ընթացակարգն է գործում, այսինքն նիստի ընթացքում ներկայացվում է բողոքը, դատավորները կարող են հարցեր տալ կողմերին, այնուհետև հեռանալ խորհրդակցական սենյակ:

«Տուժողի ներկայացուցիչն իր բողոքով պահանջում էր երկարատև փորձաքննություն կատարել՝ պարզելու, թե ինչքան գումար է պետք Տաթևիկ Հակոբյանի բուժման համար: Իմաստ չուներ, քանի որ այդ հարցի պատասխանը ոչ թե դատական ընթացակարգով պետք է ստանային, այլ դիմեին Կարմիր խաչի հիվանդանոց, հետազոտվեր ու վաղուց արդեն պատասխանը կունենային, հատկապես որ գումարը վճարելու էր ոչ թե Վարդան Պետրոսյանը, այլ ապահովագրական ընկերությունը: Անիմաստ էին առաջարկվող ձգձգումները: Վերաքննիչ դատարանը հասկացել էր դա: Բողոքն ավելի շատ ուղղված էր նրան, որ ձգձգեին Վարդան Պետրոսյանի վերաբերյալ դատավարությունը, այլ ոչ թե կոնկրետ հարցի պատասխան տալ»,- ասաց Վ. Պետրոսյանի փաստաբանը:

Պատասխանելով հարցին, այսինքն հենց ապրիլի 1-ին վերաքննիչ դատարանը կհրապարակի՞ որոշումը, Ն. Բաղդասարյանն ասաց. «Չեմ կարող ասել, որովհետև մենք գործողություններ ունենք անելու ապրիլի 1-ին»:

Իսկ թե կոնկերտ ի՞նչ գործողություններ, փաստաբանը չցանկացավ նշել:

Վերաքննիչ դատարանի որոշումն օրինական ուժի մեջ մտնելուց հետո, եթե իհարկե, տուժող կողմը վճռաբեկ բողոք չներկայացնի, Վարդան Պետրոսյանի նկատմամբ կկիրառվի բաց ռեժիմով պատիժը, այսինքն իր պատիժը կկրի ազատության մեջ:

Հիշեցնենք, որ հունվարի 29-ին Կոտայքի մարզի ընդհանուր իրավասության առաջին ատյանի դատարանի վճռով Վարդան Պետրոսյանին մեղավոր է ճանաչվել ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ) նախատեսված հանցագործության կատարման մեջ, նրա նկատմամբ պատիժ է նշանակել` ազատազրկում 5 տարի ժամկետով` տրանսպորտային միջոցներ վարելու իրավունքից զրկելով` 2տարի ժամկետով: Պատժի կրման սկիզբը հաշվել 2013թ. նոյեմբերի 6-ից: Բացի այս, դատավճռով տուժողների և տուժողների իրավահաջորդների ներկայացուցիչներ Ռ. Բալոյանի և Զ. Վարդանյանի կողմից ներկայացված քաղ. հայցը թողնվել է առանց քննության: