Աշոտ Հայրունի. Գերմանիայի կողմից Հայոց ցեղասպանության վերջնական դատապարտման լուրջ արգելքներ չկան
Գերմանիայի բունդեսթագի կողմից դեռևս տասը տարի առաջ Հայոց ցեղասպանության վերաբերյալ ընդունած բանաձևը, որով այդ ոճրագործությանը իրավաքաղաքական պատշաճ գնահատական չի ստանում, չի ճանաչվում և դատապարտվում որպես այդպիսին, կարող է շատ կարևոր և հուսալի հենարան դառնալ երկրորդ քայլը կատարելու ճանապարհին: Լրագրողների հետ հանդիպման ժամանակ ասաց պատմական գիտությունների դոկտոր, պրոֆեսոր, ԵՊՀ Հայոց պատմության ամբիոնի պրոֆեսոր, Հայոց ցեղասպանության վերաբերյալ գերմանական արխիվներն ուսումնասիրող Աշոտ Հայրունին:
«Գերմանիայի բունդեսթագն ընդունել է բանաձև, որտեղ պատմական իրականությունը շատ հստակ է ներկայացված, Գերմանիան ընդունում է սեփական պատասխանատվության գիտակցումը և դրան դիմադարձ կանգնելու անհրաժշտության ընկալումը, դրանից ածանցված պարտավորությունները: Պետք է մեր արտաքին քաղաքական ռազմավարությունը կառուցել այնպես, որ բանաձևը դառնա նախադրյալ Գերմանիայի կողմից Հայոց ցեղասպանության ճանաչման ու դատապարտման գործընթացը ավարտին հասցնելու, Գերմանիայի համապատասխանատվության հենքի վրա արագացնել կամ արդյունավետ դարձնել նաև Թուրքիայի կողմից Ցեղասպանության ճանաչումը»,- մանրամասնեց նա:
Ա. Հայրունին նշեց, որ այս տասը տարվա ընթացքում քաղաքական այլ նախաձեռնություն չի եղել, որոնք միտված լինեին բանաձևից հետո արդեն երկրորդ քայլն իրականացնելու առաջարկով: Միաժամանակ պատմաբանը փաստեց, որ այսօր Գերմանիայում հասարակական ճնշում կա, նաև լրատվամիջոցներն են ակտիվորեն հանդես գալիս ի նպաստ Հայոց ցեղասպանության ճանաչման և դատապարտման:
«Այս բաղադրիչը, ինչպես նաև հենց Բունդեսթագի ընդունած բանաձևով հաստատված համապատասխանության իրողությունը օգտագործելով, կանխատեսվում է առաջիկա տարիներին Գերմանիայի կողմից Հայոց ցեղասպանության մոտալուտ ճանաչում»,- ասաց Ա. Հայրունին՝ ընդգծելով, որ Գերմանիայի կողմից Հայոց ցեղասպանության վերջնական դատապարտման լուրջ արգելքներ չկան:
Ըստ նրա, կան մարդիկ, ովքեր սպասում են, ապրիլի 24-ին գերմանական բունդեսթագում նախատեսված քննարկման ժամանակ Գերմանիան կճանաչի Հայոց ցեղասպանությունը, ոմանք էլ այդ օրն ակնկալում են սկանդալ:
«Այդ օրը Գերմանիայի բունդեսթագում կայանալու է Հայոց ցեղասպանության թեմայով քննարկում: Ակնկալիքները բազմազան են՝ սկսած նրանից, որ կառաջանա մեծ սկանդալ, կամ՝ Հայոց ցեղասպանության ճանաչման կողմնակիցների, ովքեր որոշակի խումբ են կազմում, պարտություն կամ հաղթանակ»,- նշեց նա:
Աշոտ Հայրունին վերջերս է վերադարձել Գերմանիայից, որտեղ մասնակցել է «Գերմանական կայսերությունը և Հայոց ցեղասպանությունը» եռօրյա կոնֆերանսին: Նա հայտնեց, որ մասնակցությունը բավականին ակտիվ է եղել: Բանախոսը նաև նշեց, որ Հայոց ցեղասպանության կապակցությամբ Գերմանիայի տարբեր քաղաքներում նախատեսված են տարբեր միջոցառումներ ողջ տարվա ընթացքում:
«Կարևոր են այս միջոցառումները հասարակական կարծիք ձևավորելու համար, քանի որ հասարակական կարծիքը որոշակի ուղղորդիչ, թելադրիչ դեր ունի կառավարության համար»,- ասաց Ա. Հայրունին: