Ձեր վստահելի աղբյուրը

Ազգային ժողովում Հարկային նոր օրենսգրքի նախագծի քննարկման ժամանակ  ԱԺ  պատգամավոր Հրանտ Բագրատյանը նշեց, որ դժգոհ է ինչպես Հարկային օրենսգրքի փոփոխություններից,  այնպես էլ հիմնական զեկուցող ՊԵԿ փոխնախագահ Վախթանգ Միրումյանի պատասխաններից:

«Որովհետև ձեր պատասխանների մեջ, ոնց ասեմ, իմ հանդեպ կա ձեռառնոցի ու շատ կներեք, հազար ներողություն՝ ցինիզմ»,- ասաց պատգամավորը:

Նրա խոսքերով՝  սահմանի վրա ավելացված արժեքի հարկի պրակտիկան շարունակվում է կիրառվել, իսկ այդ դեպքում ԱԱՀ-ն դառնում է շրջանառության հարկ.  «Ես լրջագույն հարց եմ բարձրացնում՝ բացառել սահմանի վրա ԱԱՀ-ի գանձումը, ինչը եղել է հայոց պետության մեջ մինչև 1996-ը։ Դուք պատասխանում եք՝ ըստ էության կոնկրետ առաջարկություն չի ներկայացվել»:

Հաջորդ հարցը հնչեցրեց՝  ինչպես կարող է անհատ ձեռնարկատերը ԱԱՀ վճարել. «Դուք պատասխանում եք՝ օրենսդրությամբ սահմանված կարգով կարող է: Հասկանո՞ւմ եք՝ անհատ ձեռներեցը չի կարող ԱԱՀ վճարել թեկուզ նրա համար, որ չի կարող հաշվապահություն պահել: Ու այս շարանը շարունակվում է… Առաջարկել էի բացառել շահութահարկի կանխավճարի ինստիտուտը, իսկ դուք ասում եք՝ միջազգային պրակտիկայում տարածված է։ Ես էլ Ձեզ ասում եմ՝ միջազգային պրակտիկայում էլ ավելի տարածված է կանխավճար չտալը, ա՜յ քեզ բան»:

Հրանտ Բագրատյանն անդրադարձավ նաև անշարժ գույքի հարկին:

«Ասում եմ՝ անշարժ գույքի հարկ պետք է ոչ միայն քաղաքացին, այլև պետական գերատեսչությունները վճարեն, մինչդեռ պատասխանում եք՝ բյուջեի միջոցները չեն հերիքում, բայց այդտեղ բյուջեի միջոցների հարց չկա՝ ինչքան գա, այնքան էլ կծախսվի:  Դրանից ԱԺ նախագահ Գալուստ Գրիգորիչը այդ դեպքում կմտածի, որ ավելորդ շենք չպահի: Ես ձեզ լրջագույն առաջարկ եմ անում, իսկ դուք թեթև ձևով «ցրում» եք»,- նշեց պատգամավորը:

Այնուհետև Հրանտ Բագրատյանը հավելեց. «Բացատրեք՝ ինչո՞ւ պիտի Հայ առաքելական եկեղեցին հարկ չտա: Հայ առաքելական եկեղեցու տնտեսական հզորացման պատճառով մենք երկու անգամ պետականություն ենք կորցրել՝  428 և 1045 թվականներին»:

Պատգամավորն անդրադարձավ հաջորդ խնդրին. «Ինչո՞ւ մարդը 20 մլրդ վաստակելու դեպքում պետությանը պետք է տա 20% շահութահարկ, 40 մլրդի դեպքում ՝ 5%, իսկ 50 մլրդի՝ 2%: Բա ո՞ւր են մնում մեր՝ փոքր բիզնեսը խրախուսելու խոստումները»:

Վախթանգ Միրումյանը վերջին հարցադրմանն ի պատասխան նշեց, որ այս մեխանիզմի հիմքում չկան պետության կողմից ակնկալվող տնտեսական ակնկալիքներ: Ըստ նրա՝  կան մեխանիզմներ, կրկնակի հարկումը բացառող համաձայնագրեր և պետք է օգտվել այդ համաձայնագրերի ընձեռած հնարավորություններից:

Անդրադառնալով պատգամավորի առաջարկին՝ եկեղեցու հարկմանը, Միրումյանը նշեց. «Եթե պնդում եք, կարող ենք վերանայել դա, բայց մենք նկատառումներ ունենք՝ նման շինությունների հետ կապված կադաստրային արժեքների գնահատման հետ, երկրորդ՝ դա բեռ է կրոնական կազմակերպությունների համար, դրա համար այս արտոնությունները պահպանել ենք: Անշարժ գույքի հետ կապված առաջիկայում հարկումն իրականացնելու ենք, հիմա պատրաստ չենք»:

Հրանտ Բագրատյանն էլ արձագանքեց՝ խոսքը նրա մասին է, որ անընդհատ եկեղեցի ենք կառուցում: «Մենք ունենք կառուցած 6600 եկեղեցի, բնակչության 1000 շնչին բաժին ընկնող եկեղեցիների թվով երկրորդն ենք քրիստոնյա աշխարհում՝ հույներից հետո, ռուսները, որ մեզանից 14 անգամ ավելի են՝ունեն  27 հազար եկեղեցի: Հունական Սանտորինի քաղաքում ամեն տուն մի եկեղեցի ունի, մենք դրան չենք հասել, բայց ուզում ենք ձգտել, իմաստը ո՞րն է»,- ասաց նա:

ԱԺ փոխնախագահ Էդուարդ Շարմազանովը տեղից արձագանքելով՝ նշեց, որ որպես հունական և հայկական արմատներ ունեցող մարդ, շատ ուրախ ու հպարտ է, որ առաջին երկու տեղերը կիսում են հայերն ու հույները: