Ձեր վստահելի աղբյուրը

Ի աջակցություն Արթուր Սարգսյանի՝ «Հաց բերողի», Ազատության հրապարակում մի քանի օր շարունակված նստացույցն ավարտվել է։  Վերջինիս սատարող երիտասարդներն այժմ անհամբեր սպասում են, թե երբ են նրան ազատության մեջ տեսնելու։

«Մենք փողոցային պայքարի դուրս եկանք, և կարևորն այն է, որ հասանք մեր ուզածին։ «Հաց բերողի» նկատմամբ կալանքը վերջապես վերացվեց։ Այլ բան է, որ նրան շատ ուշ ազատ արձակեցին՝ առողջական վիճակի վատթարացումից հետո։ Նա այժմ լուրջ խնդիրներ ունի, և մենք չենք բացառում, որ Ազատության հրապարակում կրկին նստացույց կամ հացադուլ կհայտարարենք՝ այս անգամ բողոքելով նրան մահամերձ վիճակի հասցնելու և նոր միայն  բաց  թողնելու առիթով»,- տեղեկացրեց Շահեն Հարությունյանը՝ Շանթ Հարությունյանի որդին։

Նրա խոսքով, անթույլատրելի է մարդուն անհիմն կերպով պահել անազատության մեջ, քայքայել առողջությունը, և եթե Արթուր Սարգսյանի վիճակը հանկարծ չբարելավի, իրենք անպայման բողոքի գործողություններ են իրականացնելու։ Շահեն Հարությունյանն այնուհետ ուղղեց իրեն՝ բողոքի գործողություններ լինելու են ամեն դեպքում՝ անկախ նրանից՝ կլավանա՞ «Հաց բերողի» վիճակը, թե ոչ։

Շանթ Հարությունյանի որդին կրկին շեշտեց, որ իրենց պայքարն Ազատության հրապարակով չի սահմանափակվելու, այն շարունակական է լինելու՝ հասարակության առավել պասիվ շերտերին ցույց տալու, որ պայքարը միայն խոսքով չէ, այլ նաև՝ գործով։

Հիշեցնենք, որ փետրվարի 27-ին մի խումբ  երիտասարդներ, այդ թվում՝  Շահեն Հարությունյանը, անժամկետ նստացույց էին սկսել Ազատության հրապարակում: Նրանք պահանջում էին փոխել Արթուր Սարգսյանի՝ «Հաց բերողի» խափանման միջոցը:

Հիշեցնենք նաև, որ դատախազի որոշմամբ Արթուր Սարգսյանի նկատմամբ ընտրված խափանման միջոց կալանավորումն այսօր վերացվել է։ Վերջինիս նկատմամբ խափանման միջոց կալանավորումը փոփոխելու և անձնական երաշխավորությունը որպես խափանման միջոց կիրառելու խնդրանքով ՀՀ գլխավոր դատախազին են դիմել ՀՀ Ազգային ժողովի «Բարգավաճ Հայաստան», «Հայ Ազգային Կոնգրես», «Օրինաց Երկիր», «Հայ Հեղափոխական Դաշնակցություն», «Ժառանգություն» խմբակցությունների և խմբակցություններում և պատգամավորական խմբերում չընդգրկված 27 պատգամավորներ: