Ձեր վստահելի աղբյուրը

«Անգամներով ավելացել է այն մարդկանց թիվը, ովքեր անկախ ինչ-որ ազդեցության տարբերակներից, քվեարկելու են սեփական կարծիքի և իրենց մոտ ձևավորված համոզմունքի հիման վրա»,- այսօր լրագրողների հետ հանդիպմանը նման դիտարկում արեց «Ծառուկյան» դաշինքից թիվ 2 ընտրատարածքում առաջադրված ԱԺ պատգամավորի թեկնածու Տիգրան Ուրիխանյանը:

Նա նշեց, որ, այնուամենայնիվ, նախընտրական գործընթացներում մտահոգության տեղիք տվող իրադարձություններ մշտապես եղել են և կլինեն։

««Ծառուկյան» դաշինքը հռչակել է փոփոխությունների ճանապարհ՝ մի կողմից իրականացվող քայլերով, որոնք հայտնի են հանրության լայն շրջանակներին, մյուս կողմից էլ գրեթե հեղափոխական ծրագրային առաջարկներով:

Ուրիխանյանի խոսքով՝ «Ծառուկյան դաշինքը» նվաճելու է  մեծամասնության քվեն և ձևավորելու կառավարություն, իսկ եթե դա տեղի չունենա, «Հանրապետական» կուսակցության հետ կոալիցիա չեն կազմի։

««Ծառուկյան» դաշինքը չի գտնում նպատակահարմար և երբևէ չի գտել, նախկինում՝ 2012-ին էլ չգնաց կոալիցիոն կառավարման և չի էլ պատրաստվում: Դրա մասին խոսում է հանդիպումների ժամանակ ամենուրեք անձամբ դաշինքի առաջնորդ Ծառուկյանը, որ իշխող կուսակցության հետ դաշինքի ձևավորումն աննպատակահարմար է համարում, անցանկալի: Կոալիցիա չի կարող լինել, եթե լիներ, կլիներ 2012-ին։ Մենք գնում ենք մեծամասնություն տանելու, եթե չտանենք, ապա կարող ենք  քննարկել միմիայն առանձին կառավարման ձևերը»,-ասաց նա։

Ինչ վերաբերում է ընդդիմության հետ միավորվելուն նա նշեց. «Միշտ ասվել է, որ մենք պատրաստ ենք քաղաքական մեծամասնության կուրսին իրական ալտերնատիվ կուրս իրականացնող ուժերի հետ համագործակցել»։

Անդրադառնալով Արաբկիր համայնքում իր՝ քարոզչական պաստառները պատռելուն, Ուրիխանյանն ասաց.«Երևույթն ինքնին խոսուն է և մարդիկ թող իրենց եզրակացություններն անեն։ Եթե անպարկեշտ գործողություններով շարժվող մրցակիցները գտնում են, որ դրանով ընտրողներին կտրամադրեն իմ անձի կամ «Ծառուկյան» դաշինքի դեմ, ապա կարծում եմ, որ դա նրանց կողմից մարտավարական սխալ է։ Ուրախ եմ, որ ոստիկանությունը, ԿԸՀ-ը հավուր պատշաճի արձագանքեցին, կարծում եմ, որ տեսախցիկներով պատած մայրաքաղաքում նման հանցագործություն բացահայտելը երկար չի տևի։ Ուզում եմ հուսալ, որ պատասխանատվության կենթարկվեն նրանք, ովքեր 90-ականի ոճով փորձում են օրինական քարոզչության դեմ ինչ-որ բան անել»։