Քաղաքական ուժերի պոպուլիստական խոստումները միայն քվեներ ստանալու համար են. Թաթուլ Մանասերյան
«Ընտրություններին մասնակցող քաղաքական ուժերի գերակշիռ մեծամասնությունը չի խուսափել պոպուլիստական խոստումների գայթակղությունից»,- լրագրողների հետ հանդիպման ժամանակ այսօր հայտարարեց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը՝ հավելելով, որ այս գնահատականը տնտեսագետներից կազմած մշտական պլատֆորմինն է, որի անունից էլ ինքը հանդես է գալիս:
«Ավելին՝ բազմաթիվ ծրագրերում դրանք ուղղակի օգտագործում են միմիայն քվեներ շահելու համար, և բնավ իրենց նեղություն չեն տվել փոքր-ինչ հստակություն մտցնել, թե ինչպես են պատկերացնում այս կամ այն առաջարկի իրագործումը»,- նշեց Թաթուլ Մանասերյանը:
Տնտեսագետի խոսքերով՝ ծրագրերի մեծ մասում կոռուպցիայի դեմ պայքարի մասին դրույթներ կան, բայց որևէ ծրագրում այդպես էլ նշված չեն հստակ քայլեր, առաջարկություններ, թե ինչպես են այդ «աղետի» դեմ պայքարելու: Նույնը, ըստ նրա, վերաբերում է ստվերային տնտեսությանը:
«Ծրագրերում բավական անդրադարձեր կան, սակայն հետաքրքիր է, որ ստվերի կրճատման, այսինքն՝ հարկման դաշտ բերելու, պետական բյուջեն եկամուտներով համալրելու և դրանից ելնելով մյուս խոստումների՝ կենսաթոշակների և նվազագույն աշխատավարձի բարձրացման կապը բացարձակ հաստատված չէ: Ավելին, կան բազմաթիվ խոստումներ, մասնավորապես, փոքր և միջին բիզնեսի հարկերից ազատելու մասով: Սակայն հարկային արտոնությունների պարագայում խնդիրներ են առաջանում՝ ինչպես հարկեր չհավաքելով կարող են բարձրացնել աշխատավարձները»,- ասաց Թաթուլ Մանասերյանը:
Ինչ վերաբերում է վարկերին, որոնց մասին գրեթե բոլորն են խոսում, տնտեսագետը նշեց, որ դա իսկապես լրջագույն խնդիրներից մեկն է, բայց ինչպես դրանք մատչելի դարձնել, ինչի հաշվին՝ դարձյալ ծրագրերում անդրադարձ չկա:
Թաթուլ Մանասերյանի խոսքերով՝ քաղաքական ուժերի նախընտրական ծրագրերում գրեթե անդրադարձ չկա գիտության զարգացման, երիտասարդ ընտանիքների Հայաստանում արմատավորվելու և իրենց մասնագիտական կարողությունն իրացնելու մասին: Մինչդեռ, ըստ տնտեսագետի, երիտասարդների ուղեղների արտահոսքի պատճառով անհնար է դառնում բազմաթիվ ծրագրերի իրագործումը:
«Այսօր, գնահատական տալով քաղաքական ուժերի մեծ մասամբ անիրատեսական խոստումներին, ուզում ենք հուսալ, որ մեր՝ առարկայական քննարկումներից բխող գնահատականը ճիշտ ըմբռնում կգտնի քաղաքական ուժերի մոտ»,- ընդգծեց տնտեսագետը:
Թաթուլ Մանասերյանը նշեց նաև, որ ծրագրերում առաջարկներն ու խոստումները մեծ մասամբ կոսմետիկ բնույթ են կրում, որոնք չեն կարող փոխել Հայաստանի տնտեսության իրավիճակը: Նրա խոսքերով՝ անհրաժեշտ են արմատական բարեփոխումներ, Հայաստանին պետք է որակապես նոր տնտեսություն:
Անդրադառնալով քաղաքական ուժերի կողմից ներդրումների վերաբերյալ խոստումներին՝ Թաթուլ Մանասերյանը նշեց, որ այս խոստումները ևս գայթակղությունների թվում են: ՀՀ կառավարությունը որոշ չափով հաշվառում է իրականացրել, թե որ ճյուղերում ինչ չափով, ինչ ծավալների ներդրում է անհրաժեշտ, որը 5 մլրդ-ից ավելի է:
«Ձևավորվել են նաև ներդրումային հիմնադրամներ և, կարծում եմ՝ դրական միտում է ներդրումներին ուշադրություն դարձնելը, բայց կարևոր է հստակեցնել, թե որ ճյուղում, որտեղ են ներդրումները փոխշահավետ և ներդրողի, և մեզ համար»,- ասաց տնտեսագետը:
Պատասխանելով Panorama.am-ի հարցին, թե քաղաքական ուժերից մեկի առաջնորդի 15 մլրդ դոլարից ավելի ներդրում ներգրավելու խոստումը որքանով է իրատեսական, այն դեպքում, երբ դա մեր ՀՆԱ-ից բարձր է, Թաթուլ Մանասերյանը պատասխանեց. «Ես գտնում եմ, որ Հայաստանում 5 մլրդ էլ, 20 մլրդ դոլարի ներդրում էլ կարելի է անել, բայց որտեղի՞ց են գալու այդ ներդրումները, ո՞ր պետություններից, և ուր պետք է ուղղենք: Պետք է հստակեցնել, թե որ ճյուղերում են կատարվելու այդ ներդրումները: Միայն գյուղատնտեսության ոլորտում առնվազն 10 մլրդ դոլարի ներդրման կարիք կա»:
Միաժամանակ Թաթուլ Մանասերյանը նշեց, որ գրեթե ոչ ոք չի անդրադառնում հարցին՝ եթե ակնկալիք ունենք դրսից միլիարդավոր ներդրումների, ինչո՞ւ մենք ներքին ներդրում չենք անում:
«Բոլորը խոսում են դրսից ներդրումներ ներգրավելու մասին, բայց ինչու պետք է միլիարդավոր դոլարների ներդրում անեն ՀՀ-ում, եթե մենք ինքներս ներքին ներդրումներ չենք անում: Եթե ներքին ներդրումները չենք խթանում, այդ դեպքում ով պետք է հետաքրքրված լինի, որպեսզի Հայաստանում ներդրումներ կատարի»,- ասաց տնտեսագետը:
Դիտարկմանը, թե ի վերջո նախընտրական ծրագրերում չկա՞ն իրատեսական տարրեր, Թաթուլ Մանասերյանը պատասխանեց. «Չի կարելի ասել՝ իրատեսական տարրեր չկան, բայց դրանք կազմում են բավական փոքր հատված։ Ավելին՝ մեկ-երկու քաղաքական ուժի դեկլարատիվ բառերից բացի հստակություն չկա, մի քանի նախադասություն է շարադրված, որն առաջին կուրսեցին էլ կարող է անել»: