ՀԽ առաջարկը՝ հանրային վայրերում ծխելն արգելելու հետ կապված
Հանրային խորհրդի անդամները նախօրեին ՀՀ առողջապահության նախարար Լևոն Ալթունյանի հետ քննարկել են հակածխախոտային նոր ռազմավարությունը, որով առաջարկվում է ընդլայնել հանրային վայրերում ծխելու արգելքը:
ՀԽ մամուլի ծառայության փոխանցմամբ՝ խորհրդի անդամները դրական են գնահատել նախարարության հակածխախոտային քաղաքականությունը՝ կարևորելով հանրային առողջության ուղղությամբ իրականացվող քայլերը, միաժամանակ մտահոգություն հայտնել, որ կտրուկ քայլերը մեր երկրում կարող են ոչ ցանկալի հետևանքներ առաջ բերել:
«Երբ աշխարհում սկսվեց ծխախոտի դեմ պայքարը, և շատ երկրներում արգելվեց հանրային վայրերում ծխելը, ծխող մարդկանց առաջին արձագանքը այդ փոփոխությանը բացասական էր, քանի որ դա ընկալվում էր իբրև մարդու իրավունքների ոտնահարում: Սակայն զարգացած երկրներում այդ խնդիրն արագ հաղթահարվեց, և հանրային վայրերում չծխելն այսօր բնական և ընդունելի երևույթ է»,-նշել է Վազգեն Մանուկյանը՝ միաժամանակ հավելելով, որ անհարժեշտ է հաշվի առնել տնտեսվարողների շահերը, քանի որ մեր երկրում սոցիալական խնդիրը բավականին լուրջ է:
Լևոն Ալթունյանը, պարզաբանելով նախաձեռնությունը, նշել է, որ իրենց նպատակը 5 տարվա ընթացքում 30 տոկոսով ծխողների քանակի նվազեցումն է, ինչն էլ իր հերթին 10 տոկոսով կնվազեցնի ուռուցքային հիվանդությունների քանակը: Այդ ցուցանիշներին հասնելու համար, ըստ նախարարի, պետք են կտրուկ քայլեր՝ տուգանքների ավելացում, հանրային վայրերում ծխելու արգելք և ծխախոտի գնի բարձրացում: «Եթե խոսքն արդյունքների մասին է, բաղադրատոմսը կա: Իսկ եթե այդ միջոցներն ավելի մեղմ լինեն, ապա արդյունքի հնարավոր կլինի հասնել ավելի երկար ժամանակահատվածում»,-ասել է Ալթունյանը:
Հանրային խորհրդում հնչել է առաջարկ հանրային վայրերում ծխելն ամբողջությամբ արգելելու փոխարեն գոնե որոշակի ժամանակահատվածում խրախուսման մեխանիզմների կիրառումը, ենթադրենք, հարկային արտոնությունների տեսքով կամ հակառակը, որից հետո կամաց-կամաց անցնել համատարած արգելքի:
«Հայաստանում բոլոր քայլերը, որոնք կատարվել են կտրուկ, հանգեցրել են անցանկալի հետևանքների: Այս դեպքում նույնպես կարող են հետևանքները ծանր լինել, ուստի պետք է այդ ամենը ճկուն եղանակներով, փուլ առ փուլ իրականացնել»,-նշել է Վազգեն Մանուկյանը:
Աղբյուրի հաղորդմամբ՝ խնդիրներից մեկն էլ գործող օրենքի չկիրառումն է, ըստ որի պետք է սահմանափակվի սրճարաններում, ռեստորաններում և այլ հանրային վայրերում ծխախոտի օգտագործումը:
Հարակից հրապարակումներ`
- Գնի բարձրացումը ազդեցություն չի ունենա ծխելը թողնելու վրա. հոգեբան
- Բաբկեն Պիպոյան. Պետք է պայքարել ոչ թե ծխողների, այլ ծխելու դեմ
- Մասնագետներ. Ծխելու դեմ ամենալավ պայքարը մարդու գրպանին կպնելն է