Ձեր վստահելի աղբյուրը

Ամանորին ընդառաջ Ֆրանսիայի Դիժոն քաղաքում նոր կյանք է ստացել «Հայրենիքի ձայն» շաբաթաթերթը: Հունվարի 11-ին լրագրողների հետ հանդիպմանը այդ մասին ազդարարեցին շաբաթաթերթի աշխատակիցները: «Հայրենիքի ձայն» շաբաթաթերթի գլխավոր խմբագիր, Համահայկական գրողների միության նախագահ Աբգար Ափինյանը նշեց, որ թերթը համացանցային չէ, տպագիր է, որովհետև այն շունչ է, ոգի, Սփյուռքից հայրենիք հասած նամակ:

Ֆրանսիական Դիժոն քաղաքի հայ համայնքի հիմնադիր նախագահ Լիլիթ Բաղրամյանը նշեց՝ առայժմ ցանկալի է, որ լինի թերթի հայերեն տարբերակը, երբ այն ճանաչում ունենա համայնքում, հետո արդեն կարելի է մտածել այն ոչ հայերի շրջանում էլ հանրահռչակելու մասին: Թերթում խոսելու են խնդիրների մասին, լինելու է առողջ քննադատություն: «Եթե փոքր արատը չհաղթահարենք՝ մեծին չենք հասնի: Մեծ բաների հասնելու համար պետք է փոքրերից սկսենք»,- ասաց նա:

«Հայրենիքի ձայն» շաբաթաթերթի պատասխանատու քարտուղար Սուսաննա Ղազարյանը նշեց, որ նախորդ տարին հագեցած էր, շատ աշխատանքներ են կատարել, այդ թվում՝ այս թերթի վերատպումը, նաև նպատակ ունեն այլ թերթեր լույս ընծայել:

«Թերթը Հայաստան-Սփյուռք գործում կամուրջ է, շատ կարևոր է, որ Հայաստան-Սփյուռք կապերն ամրապնդվեն, Հայրենիքի ձայնը հասնի աշխարհում: Սփյուռքի նախարարության հետ են համագործակցում, նյութեր են փոխանակում: Արդեն շատ գործեր արել ենք և կանենք հետագայում: Թերթի շնորհիվ մենք կարողացանք մի փոքրիկ լույս վառել, կանթեղ, որի շուրջը համախմբեցինք մեր հայրենակիցներին»,- ասաց նա:

Ափինյանն ընդգծեց, որ շատ մեծ նվիրում կա աշխատակազմում, գիշերը ժամը չորսին  է աշխատանքն ավարտվում, և որևէ մեկը չի դժգոհում: Թերթում պատմում են հայ զինվորների, բանակի առօրյայի, զինվորների սխրանքի մասին, որ ներկայացվի սփյուռքին, համագործակցում են ՊՆ հետ, թերթի էջերում կլինեն նաև դասական ու ժամանակակից գրողներ:

«Մենք ուզում ենք վերականգնել սփյուռքահայության հետ մշակութային կապի կոմիտեն: Հավանաբար հաջորդ համարից կգրվի, որ թերթը այդ կոմիտեի պաշտոնաթերթն է: Այդ կոմիտեն լավ է աշխատել, այդ ավանդույթը չի կարող մոռացվել»,- ասաց նա:

Ափինյանը խոստացավ՝ թերթը բարություն է տարածելու, սակայն չի խուսափելու քննադատությունից: Նա ընդգծեց՝ առհասարակ, մտավորականությունը միշտ սեփական կարծիքն ունեցող խավ է եղել, նա երբեք չի դառնալու կամակատար: «Մենք մեր սկզբունքները պիտի պաշտպանենք, թերթում առաջիկայում նաև քննադատություն պիտի լինի: Մենք ուզում ենք՝ մեր երկիրն ազատվի թերություններից, չենք պատրաստվում՝ 22-րդ դարում ապրել նախորդ դարերի թերությունները շալակած»,- ասաց նա:

Նա կարևորեց ուշադրությունը սահմանամերձ գյուղերի նկատմամբ, տեղեկացրեց, որ ծրագիր ունեն՝ գնալ դեպի սահմաններ, ընթերցասիրություն տարածել այնտեղ: Ափինյանը նշեց՝ այդ ծրագրով՝ յուրաքանչյուրը գիրք կարդալու համար դրամական պարգև է ստանալու, ասենք՝ երեխան կարդա Գևորգ Մարզպետունին, դրա համար ստանա 20 000 դրամ, իսկ այս խնդիրները պետք է արտացոլվեն թերթում: «Վայրենի կապիտալիզմի արշավը Հայաստանի դեմ պետք է դադարեցվի, փոփոխությունները պետք է կատարվեն ի նպաստ մեր ժողովրդի»,- ասաց նա: