Ձեր վստահելի աղբյուրը

Հայաստանում տարեցտարի ավելանում է էսթետիկ վիրահատությունների դիմողների քանակը, դրան նպաստում է Հայաստանում էսթետիկ վիրահատությունների բավական բարձր որակը և գների մատչելիությունը: Այսօր լրագրողների հետ հանդիպմանն այս մասին նշեց Էրեբունի ԲԿ պլաստիկ վիրաբույժ Էդգար Հայրապետյանը: Նրա խոսքով՝ Հայաստանում առաջին տեղում քթի պլաստիկան է, իսկ միջազգային վիճակագրությամբ՝ առաջին տեղում կրծքի պլաստիկան է, որից հետո քթի վիրահատությունը, լիպոսակցիան և այլն:

«Յուրաքանչյուր ոլորտում, բնականաբար, գոյություն ունեն բարդություններ, սակայն քանի որ էսթետիկ վիրահատությունները հիմնականում գեղեցկացնելու, բարելավելու նպատակին են ուղղված, ցանկալի է բարդություններից խուսափելը»,- ասաց Հայրապետյանը՝ հավելելով, որ այդ բարդությունները մահացու չեն, սակայն արտաքին տեսքի խաթարման հետևանքով ցանկալի չեն:

Նրա խոսքով՝ էսթետիկ վիրահատությունների դիմում են սոմատիկ առողջ պացիենտները:

Հայաստանում գնային առումով մատչելի են պլաստիկ վիրահատությունները, հարևան Վրաստանի հետ համեմատելիս տարբերությունը շատ չէ, սակայն ՌԴ և ԱՄՆ համեմատ՝ նկատելի տարբերություն կա:

Հայաստանում պլաստիկ միջամտությունների դիմողների մեծ մասը կանայք են, տղամարդկանց թիվը ևս տարեցտարի ավելանում է, ընդ որում՝ երիտասարդներինը, սակայն վերջերս բժիշկին 70 տարեկան տղամարդ է դիմել կոպերի պլաստիկայի համար: Դա հաճելիորեն զարմացրել է բժիշկին, պլաստիկ միջամտությունը կատարվել է:

Խոսելով վիրահատական բարդությունների ու հետևանքների մասին, երբ ստիպված են լինում կրկին վիրահատության դիմել, Հայրապետյանը նշեց, որ վիրաբույժ չեն ծնվում, դառնում են: Յուրաքանչյուր վիրաբույժ ունենում է իր սխալները, չկա վիրաբույժ, ով ասի՝ միշտ լավ եմ վիրահատել, միշտ ինձ մոտ ստացվել է: Հայաստանում տարեցտարի զարգանում է նաև բժշկական տուրիզմը, այս առումով պահանջարկված է ստոմատոլոգիան, էսթետիկ վիրաբուժությունը:

«Քթի վիրահատությունը անձամբ ես կատարում եմ միայն ընդհանուր անզգայացման պայմաններում, բայց եթե փոքր շտկումներ են պետք, կարելի է նաև տեղային անզգայացմամբ անել: Կան դեպքեր էլ, երբ հակացուցված է ընդհանուր անզգայացումը: Տեղային անզգայացմամբ պետք է կատարել հիմնականում փոքր շտկումները»,- ասաց նա:

Խոսելով քթի՝ ոչ վիրահատական պլաստիկայի մասին՝ Հայրապետյանը նշեց, որ պետք է լինի ցուցում, եթե կա ցուցում, կարելի է ներարկման միջոցով քթի արտաքին տեսքի ուղղում կատարել, դա կարելի է անվանել փոքր գործողություն, բայց ոչ՝ վիրահատություն: Այս միջամտության ազդեցությունը երկարաժամկետ չէ՝ վեց ամսից մինչև մեկ տարի, սակայն այն բավական մատչելի է:

Բժիշկը նշեց՝ պացիենտին հաճախ թվում է՝ քիթը առանձին հատված է, մինչդեռ պետք է հաշվի առնել դեմքի կառուցվածքը, դեմքի չափը, բերում են փոքր քթի նկար, ասում են՝ այս քիթն եմ ուզում:

Պացիենտին ադեկվատ պետք է բացատրել՝ ինչ սպասելիքներ, ինչ ակնկալիքներ պետք է ունենան. այս հարցում նրանց օգնում է մոդելավորումը, որով մոտավոր պատկեր են ստանում՝ ինչպիսին է լինելու արդյունքը:

Հայրապետյանի խոսքով՝ պլաստիկ միջամտությունների շնորհիվ պացիենտները հաճախ կոմպլեքսներից են ազատվում: «Շատ են ասում՝ քիթը վիրահատեց, ամուսնացավ, կամ գալիս են ծնողները, ասում՝ դե բալես, քիթդ վիրահատի, էս տարի ամուսնացի: Սա չի նշանակում՝ քիթը վիրահատեց, աշխարհի գեղեցկուհին դարձավ, պարզապես ինքնագնահատականն է բարձրանում»,- ասաց նա:

Հարցին՝ լինու՞մ են դեպքեր, երբ ակնհայտորեն որևէ պլաստիկ միջամտության կարիք չունեցող պացիենտներ են իրենց դիմում, Հայրապետյանն արձագանքեց. «Եթե մարդը գալիս է բժշկի մոտ, արդեն խնդիր ունի, տեսնում ես՝ քիթը նորմալ է, բայց ունի հոգեկան խնդիր, մտածելակերպի խնդիր, չի համակերպվում իր արտաքին տեսքի հետ»: Այս դեպքում երբեմն փորձում են գոնե մի փոքր միջամտություն անել, որ հիվանդի ինքնագնահատականը փոխվի: Պլաստիկ վիրաբույժներին դիմելիս շատ հաճախ են գալիս՝ հայ և արտասահմանյան աստղերի նկարները ձեռքներին: «Ինչքան աստղեր կան, բոլորի նկարները բերում են, նույնիսկ ում նկարը չէի տեսել, տեսա, սովորեցի»,- նշեց բժիշկը:

Կրծքի պլաստիկ վիրահատության հետևանքով առաջացած բարդություններից խոսելով՝ Հայրապետյանը նշեց՝ կրծքագեղձ, վիրահատություն, իմպլանտների օգտագործում, սրանք բժշկական ոլորտում երևի ամենից շատ ուսումնասիրված թեմաներից են, հսկա ֆիրմաները, որ իմպլանտ են արտադրում, իրենց հետաքրքրում է՝ արդյոք կարող են խնդիրներ առաջանալ: Բժիշկը վստահեցրեց՝ իմպլանտների հետևանքով օնկոլոգիական խնդիրներ չեն առաջանում, կարելի է նաև կերակրել երեխաներին: 

Հայրապետյանը նշեց, որ իրենց դիմում են ոչ միայն էսթետիկ խնդիրներ լուծելու համար, պլաստիկ վիրաբուժությունը և միկրովիրաբուժությունը կողք կողքի քայլող մասնագիտություններ են: Դիմում են անդամահատված վերջույթների դեպքում, ուռուցքներից հետո դեֆեկտների լրացումներ են արվում, սա բավական ծավալուն ոլորտ է:

Թե աշխարհի երկրների շարքում պլաստիկ վիրահատությունների թվով Հայաստանը որ տեղում է՝ վիճակագրություն չկա, բայց բժիշկը նշեց՝ եթե հաշվի առնենք Հաւյաստանի բնակչության և կատարվող վիրահատությունների քանակը, երևի թե աշխարհի մակարդակով մենք կլինենք տասնյակում:

Կատարվում են նաև հասակի բարձրացման վիրահատություններ, դա կատարում են համապատասխան մասնագետները, Հայաստանում ևս նման վիրահատություն է կատարվում, դրա շնորհիվ հնարավոր է հասակն ավելացնել մինչև 10 սմ, եթե ոչ ավել:

Պլաստիկ վիրաբույժի՝ Էդգար Հայրապետյանի օգնական Հարություն Հարությունյանը նշեց, որ հասարակության մոտ առաջին հայացքից «պլաստիկա» բառը ասոցացնում են արհեստական նյութերի հետ, սակայն այն հունարեն նշանակում է ստեղծել, սարքել, ձևավորել: Կրծքագեղձի առաջին պլաստիկ վիրահատությունը կատարվել է 1800-ականներին՝ վերականգնողական նպատակներով, կրծքագեղձի ուռուցք ունեցող, վիրահատված մի կնոջ մոտ: Նա մեջքին ճարպային գոյացություն է ունեցել, վիրաբույժը այն փոխպատվաստել է, ստացել կրծքագեղձ: 70 տարի հետո նոր հայտնաբերել են սիլիկոնային իմպլանտանտը, որ մինչ օրս օգտագործվում է կրծքագեղձի պլաստիկայի մեջ: