Ձեր վստահելի աղբյուրը

Քիչ առաջ մեկնարկել է «Լուսավոր Հայաստան» կուսակցության երկրորդ համագումարը: Բացի կուսակցության գործընկեր երկու քաղաքական ուժերից՝ «Հանրապետական» և «Քաղաքացիական պայմանագիր» կուսակցություններից, համագումարին այլ ուժեր չեն մասնակցում:

Միջոցառմանը ներկա են  «Ելք» խմբակցության պատգամավորներ Սասուն Միքայելյանը, Նիկոլ Փաշինյանը, Արամ Սարգսյանը, Արտակ Զեյնալյանը, նաև Երևանի ավագանիում համանուն խմբակցության անդամներ։

Կուսակցության կանոնադրությամբ նախատեսված փոփոխություններով համագումարը կընտրի նոր Կառավարման խորհուրդ, Խորհրդի նախագահ և կստեղծվի նոր մարմին՝ Քաղաքական խորհուրդ։

Համագումարին հյուրերի թվում է նաև Եվրոպայի լիբերալների և ժողովրդավարների ալյանսի (ALDE) փոխնախագահ Հենրիկ Բախ Մորտենսեն:

Ինչպես իր ելույթի ընթացքում ասաց «Լուսավոր Հայաստան» կուսակցության նախագահ, ԱԺ «Ելք» խմբակցության պատգամավոր Էդմոն Մարուքյանը, երկու տարում քաղաքական ուժը զարգացման լուրջ ճանապարհ է անցել՝ դիմակայելով բազմաթիվ մարտահրավերներին:

«Մենք անցել ենք վճռական շրջափուլեր, մասնակցել ՏԻՄ ընտրություններին՝ մարդկանց ներկայացնելով մեր նպատակները: Այս կարճ ժամանակահատվածում մեր կուսակցությունն անցել է երեք խոշոր ընտրական գործընթացների միջով՝ այդ թվում՝ ՏԻՄ ընտրությունների միջով Գյումրիում և Վանաձորում: Վանաձորյան ընտրությունները դարձան լուրջ փորձաքար՝ իբրև թե բարեփոխված քաղաքական համակարգի համար»,- ասաց Էդմոն Մարուքյանը:

«Լուսավոր Հայաստան» կուսակցության նախագահը նկատեց, որ իր ղեկավարած քաղաքական ուժին, «Հանարապետություն» «Քաղաքացիական պայմանագիր» կուսակցություններին միավորեց եվրոպական մոդելի պետություն ստեղծելու տեսլականը:

«Ինչպես ասում է հայտնի լատինական ասույթը՝ փշերի միջով դեպի աստղեր: Անցած երկու տարիներն իրավամբ բարդ, տարբեր իրադարձություններով լեցուն տարիներ էին»,- ասաց նա:

Մարուքյանը առաձնահատուկ կարևորեց համագործակացությունը համաեվրոպական և միջազգային ասպարեզում. «Այսօր սերտորեն համագործակցում ենք Եվրոպայի լիբերալների և ժողովրդավարների ալյանսի (ALDE) հետ, որի անդամակցությանն է ձգտում «Լուսավոր Հայաստան» կուսակցությունը»:

Նա նաև կարևորեց այլ միջազգային հիմնադրամների հետ համագործակցությունը:

«Լուսավոր Հայաստան» կուսակցության ղեկավարը ներկայացրեց կուսակցության մանիֆեստը, որը պետք է ընդունվի համագումարի ընթացքում:

«Այս համագումարում պետք է ընդունենք մի փաստաղթուղթ, որը կոչվում է «Իրավունքի գերակայության մանիֆեստ»: Այն, ըստ էության, ԼՀ-ի 2015թ-ի դեկտեմբերի 12-ին ընդունած ծրագրի շարունակությունն է և կից փաստաթուղթը: Ելնելով ՀՀ-ի առջև ծառացած գլխավոր մարտահարվերներից, ընդունելով մանիսֆիսետը` կուսակցությունը ևս մեկ անգամ վերահաստատում է, որ Հայաստանի զարգացման երկարաժամկետ անվտանագության և համընդահանուր բարօրության գլխավոր երաշխավորը եվրոպական մոդելի պետության կառուցումն է: Մենք այլ ռեսուրս չունենք այլ մոդելի պետություն կառուցելու համար: Ժողովդավարության կառուցման համար իրավունքի գերակայության հաստատումն է»,-ասաց նա:

Անդրադառնալով ներքաղաքական զարգացումներին՝ բանախոսը նկատեց, որ սահմանադրական փոփոխություններից հետո Հայաաստանում ժողովրդի իշխանության բաշխման համակարգը չի փոխվել:

«Շարունակում է գործել հաղթողին ամեն ինչ, պարտվողին՝ ոչինչ սկզբունքը: Իշխանություններն, ըստ էության, զբաղված են իմիտացիոն գործընթացներով և դրական տեղաշարժեր չեն արձանագրում, որի արդյունքում պետություն առաջ չի շարժվում: Սահմանադրության փոփոխությամբ Հայաստանն իբրև թե դարձել է  խորհրդարանական պետություն, սակայն փաստացի իշխանության վերաբաշխում տեղի չի ունեցել: Խորհրդարանը չի ստացել Սահմանադրությամբ ենթադրվող իր լիազորություններն ու կշիռը, փոխզիջման ու հավասարակշռման մեխանիզմներ չեն ստեղծվել: Իշխանությունը փաստացի դարձել է անվերահսկելի»,-ասաց նա:

Էդմոն Մարուքյանի համոզմամբ՝ ըստ էության ուժեղ նախագահական իշխանությունը փոխվում է ուժեղ վարչապետական կառավարման:

«Խորհրդարանական կառավարման քողի ներքո հաստատվում է մեկ անձի անհամաչափ ուժեղ իշխանություն: Այս գործընթացը լրջագույն մարտահրավեր է  նետում մեր երկրում քաղաքական համակարգի կայացման և ժողովրդավարության կայացմանը՝ դառնալով մեծագույն սպառնալիք մեր պետականության համար»,-ասաց նա և հայտարարեց, որ «Լուսավոր Հայաստանը» հանդես է գալիս սահմանադրական ամբողջական և համապարփակ իրագործման պահանջով:

«Առանց քաղաքական հավասարակաշման՝ հնարավոր չէ առողջացնել ՀՀ-ի հիվանդ քաղաքական համակարգը և զարգացնել պետական ինստիտուտները»,-ասաց նա և նշեց, որ իրենք հավատարիմ են ազատական սկզբունքներին և իրենց համարում են համաշխարհային լիբերալ ընտանիքի անբաժան անդամ: