Ձեր վստահելի աղբյուրը

«Հեղափոխությունից հետո եղան նշանակումներ, որոնք ընդունվեցին մեծ վերապահումներով, ոչ միանշանակ»,- «Մեդիա կենտրոնում» «Կադրային քաղաքականությունը հետհեղափոխական Հայաստանում» թեմայով քննարկմանն ասաց «Հելսինկյան ասոցիացիա» իրավապաշտպան կազմակերպության ղեկավար Նինա Կարապետյանցը։ Նա նշեց, որ ի տարբերություն Վալերիյ Օսիպյանի, ով նշանակվել է ՀՀ ոստիկանապետ, նախկին փոխոստիկանապետ Հունան Պողոսյանը, թեև մեծ մասշտաբով որոշումներ կայացնող չէր, ի վերջո այնպիսի պաշտոներ էր զբաղեցնում, որտեղ որոշում կայացնող էր։

«Այն մարզում, որտեղ նշանակվեց մարզպետ, բացառիկ հանցագործություններ էին տեղի ունենում, նույն Հունան Պողոսյանը որևէ բան չէր ձեռնարկում բացահայտելու համար։ Ուզում եմ հասկանալ՝ ի՞նչ է փոխվել Հունան Պողոսյանի մեջ հեղափոխությունից հետո, որ առիթ է տալիս ենթադրելու, որ նա կարող է աշխատել ազնիվ,  նվիրյալ և նույն հեղափոխության ոգով շարունակի»,- ասաց Ն. Կարապետյանցը։ 

Նա ընդգծեց, որ Հայաստանում առհասարակ քաղաքական ռասիզմ չկա,  մարդիկ խնդրում են պատասխանատվության ենթարկել այն  բոլոր պաշտոնատար անձանց, որոնց գործողություններում առնվազն  հանցագործության տարրեր են եղել։

«Ես խոստանում եմ վարչապետին, որ ամեն օր իմ ամեն հարցազրույցներից առաջ  ասելու եմ, որ Հունան Պողոսյանը պետք է հեռացվի աշխատանքից, պատասխանատվության ենթարկվի։
Քրեակատարողական հիմնարկներում պահվող անձանց համար համաներում ստանալու համար բավականին երկար պրոցես է, բայց մեկ էլ պարզվում է, որ Նիկոլ Փաշինյանը միանձնյա որոշել է մի ամբողջ հանցավոր համակարգի գոնե առանձին անձանց ներում շնորհել։ Շատ ներողություն, էդ հանցագործությունները, որ իրականացրել են այդ անձիք, իրենք իմ նկատմամբ, ժողովրդի նկատմամբ են նաև իրականացրել, իրավունք չունի վարչապետը միանձնյա որոշի, որ սրանից հետո Հունան Պողոսյանը պատասխանատվության չի ենթարկվելու։

Այսպիսի կարևորություն ունեցող որոշումներն իրավունք չունի միանձնյան կայացնի անգամ հասարակության համար կիսաաստվածային վիճակում գտնվող Նիկոլ Փաշինյանը  և որևէ մեկը»,- նշեց Ն. Կարապետյանցը։ 

Քննարկմանը ներկա Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն ասաց, որ հանրային դաշտում միատեսակ էր եզրակացությունը, որ այս նշանակումը չպետք է լիներ։

«Այս նշանակումն այն ցայտուն օրինակն է, որ ինչ չի կարելի անել»,- նշեց նա՝ հավելելով, որ այսպես էլ չիմացան, թե շարժառիթը որն է։

«Հիմնավորումն այն էր, որ քաղաքական ռասիզմ թույլ չտրվի։ Շատ անհաջող, ոչ տեղին մոտեցում է, որովհետև Հունան Պողոսյանը քաղաքական գործիչ չի եղել, եղել է քաղաքական իշխանության գործիքը»,- հավելեց իրավապաշտպանը։

Ա. Սաքունցի խոսքով, պահանջ է, որ Հունան Պողոսյանը պաշտոնանկ արվի, իշխանությունն եզրակացություն անի։ Նա նշեց, որ պետք է շարունակել պահանջելը, բողոքի ձայնը, մինչև խնդրի լուծումը։

«Կարծում եմ՝ Հունան Պողոսյանը, նոր Հայաստանի տրամաբանությունից ելնելով, առնվազն ինքը պետք է հրաժարական տա, եթե ինքը հավակնում է  հանդես գալ որպես նոր Հայաստանի աջակիցը»,- ասաց Ա.Սաքունցը։

«Վելես» իրավապաշտպան կազմակերպության նախագահ Մարինա Պողոսյանն ասաց, որ Հ. Պողոսյանի նշանակման դեպքում տրամաբանության մասին խոսք չի կարող լինել։

«Իհարկե, գնահատում եմ կոլեգաներիս իրավագիտակացությունը, որ չեն ուզում անմեղության կանխավարկած խախտել, բայց Հունան Պողոսյանը հանցագործ է, ունեմ փաստեր, որոնք ոչ միայն ինձ են վերաբերվում։

Ուզում եմ, որ բոլոր հանցագործները... ինչի՞ մենք մոռացել ենք ջրցաններն ու ամեն ինչը։ Այո, մենք մեղավոր ենք, որովհետև Օսիպյանի նշանակումից հետ երևի ավելի խիստ պետք է քննադատեինք։ Բայց մտածեցինք, որ կատարող է, միտինգ ցրող է, լավ կատարող է եղել, համակարգի աշխատող է, վարչապետը հնարավորություն է տվել, որպեսզի իրեն դրսևորի որպես ոստիկանապետ, մենք էլ նստենք, նայենք։ Բայց մենք այսօր նայելու ժամանակ չունենք, թե Սյունիքի մարզը մի հատ էլ ոնց կկործանվի։

Չի կարելի միշտ հասարակության վրա թողնել այս բեռը և ծանրությունը։ Մենք և երիտասարդները ծնվել ենք ապրելու համար, ոչ թե անընդհատ փողոց դուրս գալու, փողոց փակելու։ Մենք մեր վստահության քվեն տվել էինք վարչապետին, որ նա կառավարի այն երկիրը, որի տերը մենք ենք։ Ինքը մեր վստահության քվեն ունենալով՝ չհարցրեց ժողովրդին։ Բայց տեսնելով, թե ինչ աղմուկ է բարձրացել նույն համացանցում, որի շնորհիվ կատարվեց հեղափոխությունը, նա պետք է մի պահ կանգներ, հասկանար՝ արդյոք այս նշանակումը ճիշտ է, թե՝ ոչ»,- նշեց նա։

Հիշեցնենք, որ հոկտեմբերի 16-ին կառավարության որոշմամբ Հունան Պողոսյանը նշանակվել է Սյունիքի մարզպետ։