Ձեր վստահելի աղբյուրը

«Արդեն մեկ շաբաթից ավելի է, որ Բաղրամյան պողոտան մեր տրամադրության տակ է»,- այսօր «Հայրենիքի փրկության շարժման» հանրահավաքի ընթացքում ասաց շարժման համակարգող խորհրդի անդամ Իշխան Սաղաթելյանը։

Նրա խոսքով, այս փողոցում են գտնվում 3 կարևորագույն ինստիտուտները՝ ԱԺ, նախագահական, ՍԴ, և հենց այդ 3 կառույցներից շատ բան է կախված։

«Այո՛, այս հարթակը Հայաստանի պայքարի հարթակ է, և այս 3 ինստիտուտներն այստեղից են լսելու ժողովրդի ձայնը։ Քանի օր է, ուզում են քարոզչություն անել, որ այս հարթակը կուսակցական, ներքին պայքարի հարթակ է։ Երբեմն ասում են, որ սա դարձել է նախընտրական հարթակ։ Սա հայ ազգի հարթակն է, այն բոլորինն է, ովքեր կարծում ե՝ Շուշին ու Հադրութը հայկական են, ովքեր մտածում են՝ Արցախը պետք է լինի ազատ և անկախ»,- նկատեց նա։

Իշխան Սաղաթելյանի խոսքով, սա այն հարթակն է, որտեղ ուզում են վերջ դնել ստին, պոպուլիզմին ու դավաճանությանը։ Ըստ նրա, այս հարթակում չկան հներ ու նորեր, չկան նախկիններ ու ներկաներ, չկան սևեր ու սպիտակներ, այս հարթակում կա եռագույն։

«Սիրելի՛ հայրենակիցներ, անընդհատ այդ հիստերիկ դավաճանն ասում է, թե մի խումբ մարդիկ եկել ու վերցնում են ժողովրդի իշխանությունը։ Այդ մարդը խաբել է, խաբում է։ Ինքը որ ասում է՝ ժողովուրդն է իշխանության, ուզում է ժողովրդին դարձնել իր դավաճանության մասնակիցը։ Հայաստանում կա մեկ մարդու դիկտատուրա, որը մենք ջարդելու ենք ու ոչնչացնենք»,- վստահեցրեց Իշխան Սաղաթելյանը։

Նա համոզմունք հայտնեց, որ հաղթանակը մոտ է, պետք չէ հիասթափվել։

«Մենք հասնելու ենք հաղթանակի։ Ազգ, բանակ, հաղթանակ։ Սիրելի հայրենակիցներ, Ալիևը երեկ հայտարարել է, որ Սյունիքում միջանցք պետք է ունենա։  Ցավոք, եթե Նիկոլը մնաց իշխանության, Ալիևը Սյունիքում միջանցք կունենա։ Դա կլինի Նիկոլի 4-րդ հանցագործությունը»,- նկատեց նա։

Իշխան Սաղաթելյանը գլխավոր դատախազին, ԱԱԾ տնօրենին և ոստիկանապետին կոչ արեց «խելքները գլուխները հավաքել» և կանգնել ժողովրդի կողքին։

«Նաև հիշեցնեմ, որ մենք նախագահին կոչ էինք արել ու պահանջել, որ ԳՇ պետին աշխատանքից ազատելու փաստաթուղթը նախագահն ուղարկի ՍԴ։ Բայց մինչ այս պահը մենք պատասխան չունենք։ Մինչև երկուշաբթի ժամկետ ունենք։ Ես բոլորիս անունից դիմում եմ ՀՀ նախագահին։ Պարոն Սարգսյա՛ն, դուք ունեք պատասխանատվություն մեր երկրում ստեղծված իրավիճակի համար։ Դուք պետք է դիմեք ՍԴ՝ վիճարկելու ԳՇ պետի պաշտոնանկության սահմանադրականությունը։ Հակառակ դեպքում, դուք պատասխանատու եք մեր երկրում ստեղծված իրավիճակի համար»,- շեշտեց Իշխան Սաղաթելյանը։

Նա նշեց, որ ՀՀ նախագահը ևս մեկ հանդիպում է խնդրել շարժման անդամների հետ. «Այդ հանդիպման ընթացքում մենք ևս մեկ անգամ այդ կոչը կհնչեցնենք»,- ասաց Իշխան Սաղաթելյանը։

«Եվ նաև դիմում եմ ԳՇ պետին. քո մնալը, քո պաշտոնավարելն արդեն բոլորիս պահանջն է, դու պետք է տեղիք չտաս սադրանքներին ու մնաս քո տեղում պինդ կանգնած, որովհետև դա պաշտոնի կռիվ չէ, դա բանակի պահպանության համար է։ Օնիկ Գասպարյանը չպետք է ենթարկվի ապօրինի հրամաններին, նա պետք է մնա՝ հանուն բանակի, հանուն Արցախի, հանուն մեր պետականության»,- ասաց նա, ապա հավելեց, որ երկուշաբթին կարևոր օր է՝ իրենց հարցերի հանգուցալուծման առումով։

Իշխան Սաղաթելյանը նշեց, եթե երկուշաբթի օրը «գերագույն գլխավոր սրիկան» կրկին դիմի ապօրինությունների և փորձ անի հեռացնել Օնիկ Գասպարյանին, իրենք երեքշաբթի 17.00-ին կհավաքվեն այս հրապարակում և կորոշեն այն քայլերը, որ պետք է անեն։

Նշենք, որ հանրահավաքից հետո շարժման անդամները քայլերթով գնալու են դեպի նախագահական,իսկ նախագահական նստավայրից արդեն երթուղին կլինի դեպի Պարոնյան փողոց։