Ձեր վստահելի աղբյուրը

«Կարծում եմ՝ մոտ ապագայում հնարավորություն կունենանք արդեն հայտարարել, որ մենք եզրափակում ենք Հայաստան-Եվրամիություն բանակցությունների գործընթացը»,- 2016թ. դիվանագիտական տարվա ամփոփիչ ասուլիսիսում ասաց արտաքին գործերի նախարար Էդվարդ Նալբանդյանը:

Նա հիշեցրեց, որ Եվրամիության հետ նոր իրավական փաստաթղթի շուրջ բանակցությունները մեկնարկել էին 2015 թվականի դեկտեմբերին, այս տարվա   փետրվարի ընթացքում կկայանա բանակցությունների 9-րդ փուլը:

«Կարծում եմ՝ մոտենում ենք եզրափակիչ փուլին, որովհետև համարյա համաձայնեցված են համաձայնագրում ընդգրկված թե քաղաքական, թե տնտեսական բոլոր դրույթների, գլուխների մեծ մասը: Մոտակա օրերին  Եվրամիությունից Հայաստանում սպասվում է բավականին կարևոր պատվիրակություն, որի մեջ ընդգրված են  նաև այս փաստաթղթի բանակցողները: Կարծում եմ՝ հնարավորություն կտա մեզ որոշ ճշգրտումներ անել բանակցային գործընթացում»,- ասաց Է.Նալբանդյանը:

Պատասխանելով հարցին թե արդյո՞ք ԵԱՏՄ անդամակցությունը չի կաշկանդում Հայաստանին այլ տնտեսական միավորումների հետ համագործակցության հարցում, Է. Նալբանդյանն ասաց. «Մենք հայտարարել էինք, որ Հայաստանի անդամակցությունը ԵԱՏՄ-ին չի նշանակում, որ մենք նվազեցնելու ենք մեր ներգրավածությունը, համագործակցությունն այլ կառույցների, երկրների հետ: Օրինակ, անդամակցությունից հետո մենք ԱՄՆ-ի հետ կնքեցինք առևտրի, ներդրումների համապարփակ կարևորագույն համաձայնագիր, ԵԱՏՄ-ին անդամակցելուց հետո ԱՄՆ –ն Հայաստանում կատարեց ամենամեծ ներդրումը:

Բանակցություններ սկսվեցին Եվրամիության հետ, և ոչ միայն մենք, նա Բրյուսելից են ասում, որ դրանք արդյունավետ են, նաև ոլորտային, տնտեսական  համագործակացության ուղղություններով: ԵԱՏՄ անդմակցությունից հետո կայացավ Հայաստանի նախագահի պետական այցը Չինաստան, ինչից հետո բավական մեծ զարգացում  ունենք Չինաստանի հետ հարաբերություններում: Հայաստանը կողմնակից է փոխգործակցության զարգացմանը բոլոր  նրանց հետ, ովքեր  շահագրգիռ են, և մենք շարունակելու ենք այդ ուղղությամբ մեր ջանքերը»: