Ձեր վստահելի աղբյուրը

ՀՀ քննչական կոմիտեն մանրամասներ է հրապարակել 2017 թվականի հուլիսին Արմավիրի մարզպետի խորհրդական Մանուկ Սիմոնյանի սպանության դեպքից: Մարզպետի կինը՝ Ռուզաննա Մկրտչյանը, ով մեղադրվում է դիտավորյալ սպանություն կատարելու մեջ, իրեն մեղավոր է ճանաչել առաջադրված մեղադրանքում և տվել խոստովանական ցուցմունքներ: Նախաքննական ցուցմունքում Մկրտչյանը նշել է, որ տարիների ընթացքում ձեռք է բերել մի շարք առողջական խնդիրներ, որոնք առաջացել են ծանր, դժվարին կյանքից, որի հիմնական պատճառը եղել է ամուսնու դաժան վերաբերմունքը:

«Նա գրեթե ամեն օր վիրավորել, ծեծել, հայհոյել է ինձ, մազերիցս բռնած՝ գլուխս հարվածել է պատերին, ոտքերով հարվածել է հիվանդ ոտքերիս, և այդ ամենը՝ առանց լուրջ առիթի: Ինձ ծառայի նման էր վերաբերվում: Այդ ամենը հանդուրժել եմ 25 տարի: Այնքան է մազերիցս բռնել, քաշել, որ մազերս պոկվել են և չեն աճել, որի պատճառով ստիպված արդեն 15 տարի կեղծամ եմ դնում: Այդ ամենը մի օր կատարվեց նաև մորս ներկայությամբ, որից հետո նա իրենց տուն վերադառնալիս սրտի կաթված ստացավ, ուզում էի ամուսնալուծվել, բայց չէր թողնում»,- պատմել է Մկրտչյանը:

Չնչին առիթով հերթական վիճաբանությունը եղել է 2017 թ. հուլիսի 22-ի առավոտյան: Մկրտչյանի խոսքով՝ ամուսինը իրեն հայհոյել է, սկսել հարվածել հիվանդ ոտքի երակներին, գլխին և մարմնի այլ հատվածներին, ինքը խնդրել է՝ չխփել հիվանդ ոտքերին, բայց՝ ապարդյուն, քթից և բերանից արյուն էր հոսում:

Լսելով քնած ամուսնու շնչառությունը՝ Ռուզաննա Մկրտչյանը նկատում է սառնարանի և պահարանի արանքում դրված կացինը, որը սովորաբար դրված է լինում այդտեղ և օգտագործվում է փայտ, միս կտրատելու նպատակով, դիտավորություն է առաջանում ամուսնուն սպանելու: Նա մտնում է ննջասենյակ, մոտ 15 անգամ հարվածում է ամուսնու գլխին, որը ստացած հարվածներից մահանում է:

«Ես տանն այդ ժամանակ մենակ եմ եղել, տղայիս զանգահարեցի և կանչեցի տուն ու պատմեցի եղելությունը, նրա հետ որոշեցինք դիակը թաքցնել ձորում: Սավանով փաթաթեցինք, կապեցինք լարով, մեքենայով տարանք ու թաքցրեցինք Դալարիկի ձորում, մի քիչ հեռու էլ հողի տակ պահեցինք նրա հեռախոսը: Այդ պահին ոչ մի զգացողություն չունեի՝ ոչ տխրություն, ոչ ուրախություն, ոչ մի բան, միայն ու միայն հիասթափությունն էր ու կյանքիս տառապանքը»,- նախաքննական ցուցմունքում ասել է նա:

Սիմոնյանի դիակը հայտնաբերվել է, երբ այդ տարածքում մի հովիվ նրա բջջայինն է հայտնաբերել: Մկրտչյանը պատմել է, որ դիակը հայտնաբերելուց հետո հասկացել է՝ այլևս իմաստ չկա՝ թաքցնելու կատարվածը, և որոշել է պատմել ողջ եղելությունը:

«Զղջում եմ, որ մարդ եմ սպանել, որն իմ կյանքը դժոխքի էր վերածել: Այդ տանջանքներին թե հոգեպես, թե ֆիզիկապես էլ չէի դիմանում, նույնիսկ մտքովս մի քանի անգամ անցել է ինքնասպան լինել, սակայն որդուս նկատմամբ ունեցած սերը հետ էր պահում այդ մտքից»,- ասել է նա:

Ըստ աղբյուրի, Ռուզաննա Մկրտչյանի մարմնի վրա կապտուկներ են հայտնաբերվել, ինչը հաստատում է, որ դեպքի օրը Մանուկ Սիմոնյանը բռնություն է կիրառել: Մկրտչյանը հոգեկան հիվանդությամբ չի տառապել և չի տառապում, նա ճանաչվել է մեղսունակ: