Ձեր վստահելի աղբյուրը

«Ձեր միջնորդությունը բացարձակ ապօրինի է, և դա փաստ է»,- խորհրդարանում ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը՝ դիմելով ՀՀ գլխավոր դատախազ Արթուր Դավթյանին։

Հիշեցնենք, որ գլխավոր դատախազը խորհրդարանին է ներկայացրել ԱԺ «Բարգավաճ Հայաստան» խմբակցության ղեկավար Գագիկ Ծառուկյանին անձեռնխելիությունից զրկելու, նրա նկատմամբ քրեկանան հետապնդում հարուցելու և նրան որպես մեղադրյալ ներգրավելու միջնորդությունը։

Պատգամավորի խոսքով, արդեն իսկ բազմաթիվ իրավապաշտպաններ ահազանգում են դատախազության գործողությունների ապօրինի լինելու մասին։

«Ես հասկանում եմ, որ Անդերսոնը հեքիաթասացության ոլորտում լուրջ մրցակից ունի այսօր, սակայն Ձեզ չի հաջողվելու որևէ մեկին համոզել, որ Ձեր ներկայացրած միջնորդության հիմքում կա որևէ փաստ, որն անմիջական կերպով առնչվում է Գագիկ Ծառուկյանի հետ։ Ինչ վերաբերում է կոնկրետ հունիսի 14-ին Գ. Ծառուկյանի բնակարանում իրականացված խուզարկություններին, ապա Սահմանադրության 96-րդ հոդվածի համաձայն, պատգամավորների նկատմամբ քրեական հետապնդում կարող է իրականացվել միայն ԱԺ-ի համաձայնությամբ։ Հիմնավորեք Ձեր գործողությունների տրամաբանությունը և փորձեք ներկայացնել այն հիմքերը, որոնցով առաջնորդվել եք»,- նշեց Ի. Տոնոյանը։

Արձագանքելով՝ Ա. Դավթյանը նշեց, որ ինքը հրապարակել է ապացույցների փոքր զանգված, որոնք անմիջականորեն կապված են ԱԺ պատգամավոր Գ. Ծառուկյանի հետ։ Նրա խոսքով, այդ ապացույցները բավարար են վերջինիս նկատմամբ քրեական հետապնդում իրականացնելու համար։

«Ինչ վերաբերում է բնակարանի խուզարկությանը, ապա քննվող քրեական գործով Գ. Ծառուկյանի անունը չի նշվել, և մեր երկրի օրենսդրության ուղղակի պահանջն է, որ ես այստեղ գնտվեմ միայն՝ անձին որպես մեղադրյալ ներգրավվելու թույլտվություն ստանալու համար։ Դուք չեք գտնի մեր օրենսդրությունում այնպիսի պահանջ, ըստ որի գլխավոր դատախազը  բնակարանի խուզարկության համար պետք է միջնորդություն ներկայացնի։ Հետևաբար, կարծում եմ, որ նախաքննական մարմինը գործել է օրենքով սահմանված կարգով»,- պատասխանեց գլխավոր դատախազը։

Ի. Տոնոյանն էլ ի հակադրումն ասաց, որ 2017 թվականին Ա. Դավթյանը եղել է գլխավոր դատախազ, բայց այդ ժամանակահատվածում խորհրդարանական ընտրությունների հետ կապված որևէ ուսումնասիրություն չի իրականացվել, թեպետ մամուլում բազմաթիվ էին ընտրակաշառքների վերաբերյալ հրապարակումները.

«Ես շատ լավ եմ հասկանում, թե ինչու քրգործեր չեն հարուցվել, որովհետև այսօրվա մեր իշխանական գործարարների սուպերմարկետներում պարզապես տեղադրված է Աննա Հակոբյանի «Սիթի օֆ Սմայլ»-ի դրամարկը։ Ես իրավունք ունեմ այդպես կարծելու»։

Պատգամավորի խոսքին տեղից արձագանքեցին իմքայլական պատգամավորները, որին ի պատասխան՝ Ի. Տոնոյանը նշեց՝ կարող եք չծվծվալ տեղերից, ապա շարունակեց իր խոսքը, ասաց, որ փաստաթղթերը, որոնք անգամ չեն տրամադրվել փաստաբանական խմբին, հայտնվել են իշխանության մաս կազմող պատգամավորների և նախարարների էջերում։

«Դուք արդյո՞ք սա խելամիտ եք համարում»,- հարցրեց պատգամավորը։

Արձագանքելով՝ Ա. Դավթյանը նշեց, որ բացարձակ ապատեղեկատվություն է, թե նախկինում ընտրությունների վերաբերյալ հրապարակային տեղեկությունների հիման վրա որևէ զարգացում չի եղել.

«Մատնացույց արեք որևէ դեպք, և միասին կտեսնենք։ Բացառված է, որ դատախազությունը վարույթ իրականացրած չլինի»։