Եթե ինձ էր վերաբերվում Փաշինյանի ասածը, մենք մեր հարաբերությունները կպարզենք դատարանում. Վահե Հակոբյան
«Այսօր մենք գործ ունենք անկայուն հոգեվիճակ ունեցող անձի հետ։ Իսկ կառավարության հետ հարցուպատասխանին մասնակցում ենք, հարցեր ենք ուղղում, որպեսզի հանրությանը պարզ դառնա, թե ով է այսօր ղեկավարում երկիրը»,- ԱԺ-ում լրագրողների հետ զրույցում ասաց «Հայաստան» խմբակցության պատգամավոր Վահե Հակոբյանը՝ պատասխանելով երեկ ԱԺ-ում Նիկոլ Փաշինյանի մասնակցությամբ տեղի ունեցած միջադեպի վերաբերյալ հարցերին։
Նրա խոսքով, երեկ կոնկրետ Նիկոլ Փաշինյանի կողմից տեղի ունեցավ հերթական էլեմենտար մանիպուլյացիոն քայլը։
Ինչ վերաբերում է ՊԵԿ հայտարարությանը՝ «Զանգեզուրի պղնձամոլիբդենային կոմբինատ» ՓԲԸ նախկին գործադիր մարմնի ղեկավարի անձնական միջոցներից վճարվել է 15 մլրդ դրամ հարկային պարտավորություն, Վահե Հակոբյանը հարցով դիմեց ՊԵԿ-ին՝ ինչո՞ւ չեն հրապարակել անունը։
«Նիկոլ Փաշինյանը երեկ ասում էր՝ գլուխները կախ բերել են, մուծել են և այլն։ Հարց՝ ո՞վ է բերել, մուծել, ո՞ւմ գլուխն է եղել կախ, ինչի՞ հետևանքով է բերել, մուծել, ի՞նչ թալանի մասին է խոսքը, ո՞ւմ է դա առհասարակ վերաբերվում։ Համոզված եմ, որ ՊԵԿ-ը հատուկ որևէ անուն չի հրապարակել, ինչով հնարավորություն է տվել Նիկոլ Փաշինյանին այս թեման բարձրացնել պոպուլիստական մակարդակի և իր հերթական ամպագոռգոռ հայտարարություններն անել»,- ասաց Վահե Հակոբյանը։
Նա նաև հավելեց, որ հարց է ուղղելու Փաշինյանին, թե ո՞ւմ նկատի ուներ երեկ ԱԺ-ում «թալանչի» ասելով։
«Եթե ինձ էր վերաբերում, մենք մեր հարաբերություններն արդեն կպարզենք դատարանում։ Ինքը, ինչպես միշտ, խոսեց վերացական»,- ասաց ընդդիմադիր պատգամավորը։
Վահե Հակոբյանն ընդգծեց, որ ինքը օգոստոսի 2-ից որևէ առնչություն չունի «Զանգեզուրի պղնձամոլիբդենային կոմբինատ» ՓԲԸ-ի հետ։
«Ինչ վերաբերում է ինձ վերագրվող փայամասին, արդեն հոգնել եմ ասել՝ երբևէ չեմ ունեցել որևէ փայամաս այդ հիմնարկում։ Մինչև 2016 թվականն աշխատել եմ գլխավոր տնօրենի առաջին տեղակալ, 2019 թվականից խորհրդի անդամ։ Սրանք տարբեր ինստիտուտներ են՝ խորհուրդ, բաժնետեր, գործադիր մարմին»։
Ի պատասխան Փաշինյանի մեկ այլ հայտարարության, Վահե Հակոբյանն ասաց, որ ինքը խոսել է Սյունիքից, խոսելու է և մոտ ապագայում էլ Սյունիքի վերաբերյալ օրենքի նախագիծ է ներկայացնելու ԱԺ-ում։
Պատասխանելով լրագրողների հարցերին, թե ինչո՞ւ է ընդդիմությունը բոյկոտում ԱԺ-ում տեղի ունեցող կարևոր գործընթացները, որպես ընդդիմադիր պատգամավոր նորմա՞լ է համարում, որ ոչ մի գործընթացի չեն մասնակցում, բայց պետական բյուջեից աշխատավարձ են ստանում, Վահե Հակոբյանն ասաց. «Համաձայն չեմ ձեզ հետ, որ մենք ոչինչ չենք անում այստեղ։ Օգտագործում ենք բոլոր գործառույթները ինչ վերաբերում է պատգամավորական մանդատին։ Ինչ վերաբերում է այս կամ այն գործընթացը բոյկոտելուն, չմասնակցելուն, որոշումը կայացնում է խմբակցությունը, ինչն ընդունում ենք ու հարգում, համարում ենք ճիշտ։ Մենք մեր գործունեությունը համարում ենք նորմալ՝ ինչը որոշում ենք, բոյկոտում ենք, ինչը չենք որոշում, չենք բոյկոտում»։
«Հայաստան» խմբակցության պատգամավորն ասաց, որ իրենք մշտապես կապի մեջ են իրենց ընտրողների հետ. «Նոր նախաձեռնությամբ ենք հանդես եկել. ինչ են ուզում մեր ընտրողները, որ մենք չենք արել, թերացել ենք, կուզեն անենք, դիմեն մեզ, մենք քննարկենք ու հնարավորության դեպքում սիրով կանենք։ Հնարավոր է մեր աշխատանքը շատ դեպքերում չերևա։ Մենք ակտիվ աշխատում ենք նաև միջազգային կառույցների հետ։ Եթե տեսնում եք, կամաց-կամաց ինչ-որ արդյունք կարողանում ենք ստանալ, օրինակ՝ առանձին դեսպանների հայտարարությունները բռնությունների, ամենաթողության վերաբերյալ»։
Հարակից հրապարակումներ`
- Փաշինյանը՝ Աժ-ում. Թափ կտամ մատ, պետք լինի ուրիշ բան էլ...
- ԶՊՄԿ-ի նախկին գործադիր մարմնի ղեկավարի անձնական միջոցներից վճարվել է 15 մլրդ դրամ հարկային պարտավորություն
- ԶՊՄԿ-ի բաժնետոմսերի 15 տոկոսի նվիրատվության պայմանագրի պատճենի չտրամադրումն անհիմն ու ոչ իրավաչափ է. Գյուրջյան
- ԶԼՄ-ն ու ՀԿ-ն դատարանի միջոցով կառավարությունից պահանջում են հրապարակել ԶՊՄԿ բաժնետոմսերի նվիրատվության պայմանագիրը
- Կառավարությունը ԶՊՄԿ տնօրենների խորհրդում կունենա ներկայացուցիչ
- Տիգրան Ավինյանը ԶՊՄԿ-ի տնօրե՞ն, թե՝ տնօրենների խորհրդի անդամ